Son Heung-min hma hun a chiang lo

Tottenham Hotspur captain Son Heung-min chu London club chhuahsan thei dinhmunah a ding a, Saudi Pro League lam chuan Son hi lak ngei tumin an thlithlai uluk hle niin an sawi - mahse, Spurs an hmanhmawh lo thung.

Kum 32 mi Son hian Spurs-ah kum khat cham tur chauhin contract a nei tawh a, a kum a tam ve tawh bawk avangin London club tan chhuahtir mai hi a finthlak mai thei.

Hetihrual hian Spurs hian Asia-a tour an nei dawn a, Asian football legend hruai tel loa zinchhuah an tum lo. Spurs hian Son-a te ram South Korea an tlawh dawn a, an ramah chuan Son hian âtchilhtu a ngah hle.

Spurs hian Son tel loin South Korea-ah tour nei ngawt se, an beisei angin ngaihven an hlawh lo ang a, sum tam tak an hlawh turah organiser nen inhmuh thiam lohna a thleng thei bawk ang.

Hei vang hian Spurs tan Son an hralh dawn a nih pawhin, South Korea zin zawh lama hralh chu thutlukna fing tur a ni.

London club hian August 31-ah Arsenal chu Hong Kong-ah an hmachhawn ang a, August 3-ah Newcastle United chu Seoul khawpuiah friendly match an khelhpui leh dawn a ni.

Spurs hian coach thar Thomas Frank an nei bawk a, Brentford boss hluiin Son-a mamawh dan a zirin, hralh loh theih a ni bawk - Bayern Munich aṭangin forward Mathys Tel an la nghet tawh a, Brentford striker Bryan Mbeumo an beisei mek bawk.

Son hian kum 2015 khan Bayer Leverkusen aṭangin Spurs hi a zawm a, match 454 a khelhsakah goal 173 khungin, assist 101 a nei a, a record hi a pui rem rem hle - kum 40 chuanga Spurs captain ni chunga European nomawi chawi leh thei hmasa ber a ni bawk a, a chhuak a nih chuan Spurs fan-ten club legend angin an hre reng tawh ang.