Inter chak zo lo

Champions League final-a an mualpho hnua an match hmasa berah Inter Milan an chak zo lo a, Club World Cup-ah Monterrey nen inhmachhawnin, 1-1 in an inhnehtawk.

Mexican club Monterrey hian minute 25-naah goal hmahruai an khung a, a khungtu hi tudang ni loin Sergio Ramos a ni - Real Madrid captain hlui hian Óliver Torres-a corner aṭanga ball kal chu a tauh lut.

Inter-in club langsar lo zawk lakah tlawm an duh lo a, chawlhlawk hman nan minute thum chauh a awm tawh tihah Lautaro Martinez chuan si phurh a sut.

Mahse, Inter-in goal dang an khung thei bik lo a, Monterrey tan Nelson Deossa chuan chakna goal khung theihna remchang nei mah se, a chhawr lo - hun tawp thlengin goal dang a lut lo.

Inter Milan tan coach thar Cristian Chivu hnuaia an match hmasa ber a ni a, Romanian coach-in a club hlui a kaihhruai hmasak berah hnehna a chang zo lo - kum 44 mi Chivu hian 2007–2014 inkar kha Inter tan hian a khel a, inkhelh a chawlhsan.

Inkhelh a chawhlsan hnuah pawh Inter Milan academy-ah coach hna a thawk zui a, Inter Milan Under-14, U17, U18 leh U19 thlengin a lo enkawl tawh a, senior team a enkawl ta.

Beisei angin club World Cup a 'hot' hleithei lo a, Monterrey leh Inter hi mipui 89,702 lenna, Rose Bowl Stadium-ah an inkhel a, fans 40,311 chiah an pungkhawm thei.