Mizoram boxing team-in Rohtak an thleng

6th Junior Boys and Girls National Boxing Championship chu vawiin aṭangin Rohtak, Haryana-ah khelh ṭan a ni dawn a, nimin khan Mizoram boxing team chuan inelna hmun an thleng. Inelna hi kum 15-17 inkar tan a ni a, June 25, 2025 thleng a awh ang.

Mizoram aṭangin hmeichhe boxer pali leh mipa boxer pariat an kal a, manager Lalthlengliana bakah coach pahnih Vanlalhriatkima leh Vanlalhriatpuii ten an ho a ni. Mizoram manager Thlenga chuan, "Selection leh Inter District inelna an hmachhawn dan thlir kha chuan, medal kan lak ngei ka ring. Fixtures a la chhuak lo a, kan fixture a fuh phei chuan medal kan la nual ang," tiin Vanglaini a hrilh.