Federer leh Nadal inkara mi kha! Fapa duat loh bik ang mai ka ni - Djokovic

Tennis khawvelah chuan Roger Federer leh Rafael Nadal te inelna boruak aia lian leh ropui kha a awm thei tawh kher lo mai thei, an kum inzat chiah lo mah se an inhlat lo a, khelmual chhung leh a pawn lama an boruak a ngaihnawm tel bawk.

Federer leh Nadal te inelna hi tennis khawvelin ropui a ti a, tennis ngainatute chu 'Roger' leh 'Rafa' angin an inṭhen phawk a ni ber mai. Anni pahnih karah hian Novak Djokovic a rawn chawr chhuak, ropui takin a rawn khel chhuak bawk a ni.

Serbian star hian Grand Slam nomawi 24 a chawi a, tluktu an awm lo; amah hnaih bertu Nadal chu vawi 22 champion a ni a, vawi 20 champion Federer a sulhnu a nep lo le bawk; major title aṭanga teh chuan Novak a chungnung fal nalh.

Mahse, Djokovic chuan, "Nu leh pa ten an fate zingah enkawl ṭhat loh leh duat loh bik nei ta se la, chumi dinhmun ang mai chu niah ka inngai," a ti. Tennis ngaina tu ten Federer leh Nadal boruak an ngaihsan lutuk avangin atan ṭantu neih ṭhat a harsa.

A harsa

Federer leh Nadal hunlaia chawr chhuak a nih miau avangin a tir lamah chuan a harsa a, tennis ngaina tuten ṭan bik leh player chuam an lo neih fur tawh avangin midang tan kawng a inhawng meuh lo - nomawi chawi tluk zetin fans neih tam pawh a harsa.

Hetiang boruak karah hian Djokovic-a'n a hming a chher thei a, zawimuangin ṭantu a hipkhawm bawk. Djokovic chuan, "Min ṭantu tam tak an awm a, min ngainatu pawh an tam tih ka hria, ka nihna anga min pawmtu an tam hi a nuam.

"Player pathum zingah erawh fapa duat loh bik ni ang maia inngaih chang ka nei, hei chu zep tur a awm lo. Engtin nge mite thinlung ka hneh theih ang tih hi ka ngaihtuah nasa thei hle a, ka nun leh khawsak phung thlak mai duh chang pawh ka nei.

"Mite ngainat theih tur anga han awm te ka tum ṭhin a, mahse an thinlungah hna a thawh loh chuan awmzia a nei thei ngai chuang lo," a tia a, a tir lamah chuan a tan hun a harsa ve leh tih a sawi bawk.

Roger leh Rafa

Roger Federer hi Switzerland mi a ni a, Rafael Nadal chu Spanish mi a ni thung. Djokovic chuan, "Europe chhim ama awm an ni a, chumi chuan mipui leh nunphungah nghawng nasa tak a ngei ngei ang tih pawh ka ring.

"Ka la hriat reng pakhat chu, engtik niah emaw chuan world number 1 ka la nih ve tur thu ka sawi a, tennis fans tam zawk chuan min huat phah hian, chutiang khawp chuan Federer leh Nadal te kha an ngaina tlat a ni.

"Mite kha chuan number 1 ni turin min duh ve lo, anni pahnih kha a chung berah in awm chhawk se la, kei chu an pahnih hnuaiah zel khan awm se min duh, hemi boruak hi chu kei pawhin duh lo mah ila thui tak ka pawmpui a ngai," a ti.

Social media an hman nasat Instagram-ah Federer hian zuitu (follower) maktaduai 12.8 a nei a, a hmang uar lutuk lo. Nadal zuitu hi mi maktaduai 21.5 an nih laiin, Djokovic zuitu te chu maktaduai 15.8 an ni thung, social media hman nasat hnua a chet ṭhat dan nena chhut chuan zuitu a ngah lo.

Mi bik pathum

British chanchinbu ten 'Big Four' tiin Federer, Nadal leh Djokovic te huangah Andy Murray an sawi lang tel hram hram ṭhin. Mahse, Murray hian Grand Slam title pathum chauh a la - Olympic champion vawi hnih ni mah se, mi bik pathum nena khaikhin tur chuan a hniam deuh.

Australian Open vawi 10 champion Djokovic chuan, "Federer leh Nadal te nen inelna thui leh ropui tak kan nei a, kei aia upa leh tawnhriat nei ṭha zawk an nih avangin kawng tam takah pah ka entawn ṭhin, an chungchang hi a ṭha lo zawnga sawi ka nei ngai lo.

"Hun lo kal zelah pawh a ṭha zawnga an chanchin sawi hi ka tum lo a, ka ti ngai hek lo ang. An pahnih zingah hian duhthlan tur zawk awm lo khawpa ṭha an ni a, chutihrualin Nadal nen kan inkhelh dun rei zawk avangin ka hrechiangin ka dah sang," a ti.

Serbian star chuan sawi zawmin, "Kan pathum khan tennis hmuhnawm kan chhawp chhuak ṭhin a, mite pawhin an ngaihlu hlein ka hria. Boruak lian tak siam kha tennis khawvel tan pawh a ṭha," tiin an inchhem alh tawn tin a sawi bawk.

Midang faktu

Grand Slam champion tam ber ni mah se Djokovic chuan a elpui player ropui dangte a dahsang thiam hle. Wimbledon vawi sarih champion Novak chuan, "Federer, Nadal leh kei hi kan inkhaikhun dawn a nih chuan, Federer hian thiamna a nei sang ber ang.

"A inkhel a hmuhnawmin a che vel a nalh thei hle a, tha khek hun a hrethiam bawk, a fing hle tihna a ni. Che muang deuh angin lang mah se a thleng hman zel tho a, a theihna hi a sang chungchuang hle.

"Rafa hi player chak leh thahrui fei bera sawi a ni a, miten a thiamna piah lamah a chakna hi hmuhnawm an ti. Thahrui a hman nasat avangin daih rei lo tura sawi an awm, mahse a kum rualpuite an chauh tawh hnuah pawh ani chu a la harh reng thung.

"Anni pahnih kara awm ka nih avang khan ka ṭhat bikna lai sawi tur a vang. An ṭhatna lai ṭhenkhat kha ka la kawp a ni ber a, hei vang hian mipui pawhin danglam bik anga min hriat ve loh chhan ni te hian ka hre ṭhin," tiin a sawi.