Match hmasa berah Alcaraz a chak

Wimbledon inbuatsaihna zinga mi Queen’s Club Championship 2025 an khel mek a, world number 2 Carlos Alcaraz chuan a match hmasa berah Adam Walton chu 6-4, 7-6 (7/4) in a hneh.

London chhim lama inelna neih laiah hian Alcaraz hi seeded pakhatna a ni a, a match lehpekah chuan amah ang bawka Spanish tlangval Jaume Munar a hmachhawn leh nghal ang.

Alcaraz hian hmanni lawk khan French Open nomawi a chawi a, tunah chuan grass court season a hmang ṭan. Wimbledon title kawl mektu a ni a, title humhim ngei tumin thapui a thawh dawn a ni.

Inkhel dangah Jack Draper pawhin Jenson Brooksby 6-3, 6-1 in a hneh. British tlangval hian season hmasa khan Stuttgart Open nomawi a chawi a, kuminah pawh a lakah beisei an nei sang - second round-ah chuan Aleksandar Vukic hnehtu Alexei Popyrin a tum leh ang.

Wimbledon inbuatsaihna dang Halle Open-ah Jannik Sinner a inlan thung a, world number 1 Sinner hian German player Yannick Hanfmann chu 7-5, 6-3 a hnehin inelna bul a ṭan fuh hle.

Season hmasa khan Halle Open-ah Sinner hi a champion, a match lehpekah chuan 2023 Halle champion Alexander Bublik a hmachhawn leh dawn a, atan fiahna hmasa tiin a sawi theih ang.

Halle Open final vawi hnih khel tawh Alexander Zverev chuan nizan khan a match hmasa ber a khel a, result erawh kan hre hman lo thung; world number 3 tan Wimbledon khel tura inbuatsaihna hnuhnung a nih a rinawm.