Antonio a inkhel leh thei ta

Concacaf Gold Cup-ah nimin khan Jamaica tan Michail Antonio chu bench aṭangin a lut a, West Ham United striker hi December thlaa lirtheia a chetsual hnua khelmuala a inlan lehna hmasa ber a ni.

June 17, Thawhlehnia inkhelhah hian Jamaica hian Guatemala 1-0 in an hneh lo a, Dignity Health Tennis Center-a inkhelah hian Oscar Santis-a'n minute 32-naah goal awmchhun a khung.

Kum 35 mi Antonio hian nikum December thla khan a Ferrari car-in thingkung a su a, a hliam na hle. A ke ruh tliak hi a nasa a, a malpui ruh pawh a chhe nasa a, zai a nih hnuah kar thum chhung damdawi inah a awm.

June 30, Thawhṭanni hian West Ham-a Antonio contract hi a tawp dawn a, London club hian an striker hma lam hun chungah thutlukna an la siam lo.

Kum 2015 khan Nottingham Forest aṭangin Anonio hian West Ham hi a zawm a, Premier League-ah match 268 khelh sak tawhin goal 68 a khung a, club top scorer a ni mek.