Man City-in chakin bul an ṭan

FIFA Club World Cup-ah Manchester City chuan Nilaini zan khan Wydad Casablanca chu 2-0 in an hneh a, Phil Foden leh Jeremy Doku ten goal an khung. Lincoln Financial Field-a inkhelah Pep Guardiola hoten harsatna lian tham tawk lo mah se hun tawp dawnah Rico Lewis hnawhchhuah a ni.

Premier League club hi chak tura rinkai an nih avang chiahin bul an ṭan ṭha a, minute hnihna lekah Savinho-a'n ṭha taka a lakluh hnuah a cross ball chu keeper El Mehdi Benadid-a'n beng chhuak ṭha tawk loin a per chu Phil Foden-a'n a ke vei lamin goal kilah a pet lut.

City an hmuhnawm zui a, goal erawh hmuh mai tur a awm lo. Nathan Ake-a'n a hun ṭha neih chu goal zawnah a tauh thei lo a, African club pawhin goal khung theihna remchang an nei tho. Darkar chanve chhoah Man City defender Vitor Reis a chesual a, Wydad AC attacking midfielder Thembinkosi Lorch-a'n Reis a bum hnuah box chhungah tawlh thluin amah pawttu tan pe tho mah se Cassius Mailula-a'n a khung thei chuang lo.

Foden-a'n goal hnih khung theihna remchang a hlah hnuah a, a corner kick pet chu Jeremy Doku-a'n a khung. Second half-ah Doku hian keeper chauh a hmachhawn hnuah a khung thei lo. City defender Rico Lewis-a'n ṭul lo zetin a khingpui player a tlawh lui a, referee-in a hmuh chian avangin a hnawt chhuak. Player 10-a khelh hnuah Man City-in chance an la nei zawk a, bench aṭanga lut Erling Haaland-a'n keeper chiah a hmachhawn hnuah a khung lo.

City tan Foden che ṭha ber mah se player thar Tijjani Reijnders leh Rayan Cherki ten bul ṭanin Pep Guardiola hnuaiah player pawimawh an ni thei tih an pholang. Inkhelh banah Pep chuan, "Reijnders kha player ṭha tak a ni tih a hriat theih a, khingpuite lama ball nena a chet dan khan lung a ti awi a, kan khelh dan a hriat bel lehzual hunah chuan tun aiin an la ṭha thei ang," tiin Dutch midfielder a fak.

French midfielder Cherki pawhin fakin Pep chuan, "Kevin de Bruyne thlak a harsa dawn tih kan hria a, chutihrualin Rayan Cherki hi a hmunruak hnawh tura kan lak chu a ni. A theihnaah khan lawmna tur tam tak a awm a, a bik takin box bul vela a chet dan khan minti lawm," a ti.

Man City hi group G-ah Wydad AC bakah Juventus leh Al Ain te nen an awm ho a, nimin zing khan Juventus-in Al Ain hi 5-0 in an sawp. Italian club tan Randal Kolo Muani leh Francisco Conceicao ten goal hnih ve ve an khung a, Kenan Yildiz-a'n goal khat a khung bawk.

Pep-a hote hian June 23, Thawhṭanni zan dar 6:30-ah Al Ain nen an inhmachhawn ang a; June 22, Pathianni zan dar 9:30-ah Juventus leh Wydad AC te an inkhel bawk ang.