Alcaraz leh Raducanu khel dun dawn

Carlos Alcaraz chuan Emma Raducanu nen US Open an khel dun dawn tih a sawi chiang a, player pahnih te hi mixed doubles huangah an inkawp dawn a ni.

Alcaraz leh Raducanu te hi US Open champion tawh ve ve an ni. US Open buatsaihtu lamin Alcaraz hnenah hian mixed doubles khel turin thurawn an pe a, ani hian ṭha a tih danah hma a la.

Spanish star Alcaraz chuan, "Emma nen hian kan inhriatna a rei tawh a, tournament kalphung min rawn hrilh hnuah khan misxed doubles khelhpui turin ka va sawm a, a lo remti ta a ni.

"US Open lamin hetiang hun ṭha min siamsak hi ka lawm a, ka phur tawh takzet a ni. Tennis kan khel dun dawn a, a thu zawk chu Emma hi a ni ang," tiin chanchinbu mite hmaah a sawi a, lawm a hlawh hle.

Tennis season khat chhungin Grand Slam pali an khel ṭhin. Australian Open leh French Open an khel zo tawh, grass court inelna lian Wimbledon an khel dawn hnai, a tawp berah US Open an khel leh ang.