Silly Point : English Nipui
"Nipui a lo thlen avangin, hlim leh lam hun a lo inherchhuak leh ta" - Led Zeppelin (Dancing Days)
English Football chawlh lailawk lai a nih avangin, infiamna ngaina hnam sap ho chuan kum tin tun ang Nikir leh Vawkhniahzawn thla-a an nghakfak ber chu Wimbledon, Silverstone Grand Prix leh Cricket season hi a ni a. Kum li hnuah Hamara Desh cricket khela ten Kumpinu ram an tlawh leh dawn ta a, an nomawi inchuh ṭhin Pataudi Trophy pawh Tendulkar-Anderson Trophy tia a sakhming thlak a ni.
Headingley, dukes & swing
5 Test Series khuh hawn nan vawiin tlai dar 3:30 hian Headingley, Leeds khelmualah inkhelh ṭan a ni dawn. Chief curator (ground enkawltupa) Richard Robinson chuan kar liam taa Lord's khelmualah WTC final ni thum chhung leka zo ang pitch beisei lo tur leh, bat leh ball intumtawkna pitch a buatsaih thu a sawi tawh a. Ni nga daih test match kan hmu turah ngai ang.
Chutihrual chuan England ram vawt, an nipui lai a nih avanga boruak uap lai ber ni lawi si, chhum leh tuihu tamnaah khuan, pitch-ah phaitual hnim ṭotir miah lo mah se, a boruak hian swing & seam movement (boruak & a sawhnua ball che kawi) hi a keng tel hrim hrim.
Chumi belhchhah tur chuan ram tamzawkah an hman Kookobora leh SG ball aia a ṭhuina nghet si, pawng zawng leh tle rei zawk Dukes ball an hman dawn avangin, pace bowler-te hi engtik lai mahin England-ah hi chuan an lakzam theih loh a ni.
Ka 11-te
Virat Kohli leh Rohit Sharma hming ham tur a awm tawh lo a. Indian Cricket team generation thar hun a inher kan ti thei ang a. 2021 a an tour hnuhnun ber ṭuma kal, tun ṭuma kal leh hi player pasarih chauh an bang tawh nghe nghe.
Yashavi Jaiswal leh KL Rahul bul ṭan tur atan ding leh vei khawr inkawp a fuh a. ODI, India A, Ranji Trophy leh IPL lama a hun ṭha neih apiang bawhpelh ngai lo Sai Sudershan tan no. 3 hi a chanpual atan sawhnghet turin debut a phu a ni.
Captain thar Shubman Gill hi opener ni mah se, captain a nih angin batting line up-a position pawimawh ber no. 4 a luah a ngai ang. No. 5 & 6 ah Rishab Pant leh mitthi tholeh Karun Nair an lut turah ngai ang.
No 7 & 8 ah Ravindra Jadeja & Nitish Reddy te all rounder role-ah lutin, fast bowler pathum Mohammed Siraj, Jasprit Bumrah leh Arshdeep Singh emaw Prasid Krishna emawte a tawp pathum an ni ngei turah ngai ang.
Tawhkhirh Kumpinu ram
Kum 2007 kuma Rahul Dravid a hnuaia game thum series-a 1-0 a an chak hnuah khan 2011,2014, 2018 mualpho takin India team te an lo hawng a nih kha. Kum 2022-ah erawh game 5 series-ah 2-2 in an inṭhaṭhen a nih tak kha maw.
Hamara Desh hian Kumpinu ramah hian hmakhawsang aṭangin record chhuan tur hi an nei chaurau khawp mai a. He India team thar anga sawi theihte hi tuboh leh dolung kara leng head Coach Gautam Gambhir tan tun series hi a va pawimawh si em. Chumi atan chuan Headingley-a bul ṭan ṭhat hi, an ke pen leh kechheh atan pawimawh hmasa ber a ni.
He thil thlentir tur erawh chuan Hamara Desh batsman-te, dawhtheihna leh kechheh (footwork) pawimawhzia a hma zawng aiin an hriat a ṭul takzet ang. Chung zawng zawng khaikhawm nan chuan , England rama ball a chet tamna hmuna pasalṭha ramvak saichal kapa lo rammu hlawhtling tawhte Don Bradman, Viv Richards, Martin Crowe, Sachin Tendulkar etc te chet ṭha chhan an hriat reng a ṭul. Heng player-te hian an taksa hlatin ball an vai ngai lo a, an lu engtiklai pawn an dah ngil ṭhin ang kha a la pawimawh reng.
India's squad: Shubman Gill (c), Rishabh Pant (wk), Yashasvi Jaiswal, KL Rahul, Sai Sudharsan, Abhimanyu Easwaran, Karun Nair, Nitish Reddy, Ravindra Jadeja, Dhruv Jurel (wk), Washington Sundar, Shardul Thakur, Jasprit Bumrah, Mohammad Siraj, Prasidh Krishna, Akash Deep, Arshdeep Singh, Kuldeep Yadav, Harshit Rana.