Coach thar pahnih - Alonso & Inzaghi

Nilaini zana Real Madrid leh Al Hilal inkhelin ngaihven a hlawh a, Hard Rock Stadium, Miami Gardens-a inkhel hi fans 62,415 ngawtin a hmunah an en.

Real Madrid boruak len vang a ni pakhat a, coach thar pahnih Xabi Alonso leh Simone Inzaghi ten boruak an nei lian bawk. Alonso hian Bayer Leverkusen aṭangin Real hi a pan a, German club-a a hlawhtlin angin a hlawhtling thei ang em, tih chu zawhna a ni.

Alonso-a'n a match hmasa berah Real a chakpui zo lo nghal a, Leverkusen ai chuan a letin pressure a sang dawn tih a chiang. Spanish coach chuan, "First half ai chuan second half-ah kan zia ta hret.

"First half-ah kha chuan kan talbuai deuh a, ball kan ken leh ken loh lai pawhin a danglam lo. Ball kan hloh awlsam em em a, kan tihleithei lo. Kan tihsual tam tak kha chu kan sawi tawh sa a ni a, siamrem turin hun kan duh ta hret a ni. Mahse, second half kan khelh danin min tilawm," a ti.

Inter Milan aṭanga Al Hilal pantu Inzaghi chuan, "Kan khel ṭha - team ṭha tak kan ni a, kan thawhhona a ṭhain, Real Madrid lakah ṭha takin kan khel thei. Khawvel team ṭha pathum zinga ka chhiar tel Real kan hmachhawn a, ka nauten an thawk ṭha takzet.

"Kan khelh danah ka lawm a, kha aia ṭha zawk beisei tur chuang a awm lo. Hma hun atan vawiin result hian min tiphur hle a ni," a ti - Inzaghi hian Saudi club tan CWC-ah result neih ṭhat chhunzawm a tum ang.