Lakers an hralh dawn ta?

Basketball team hlun leh ropui Los Angeles Lakers chuan neitu thar a nei dawn, kum 46 chhung a neitu lo ni tawh Buss chhungkua chuan billionaire Mark Walter hnenah an hralh dawn a, dollar tluklehdingawn 10 zetin an hralh dawn a ni.

Buss chhungkua hian kum 1979 aṭang khan Lakers hi an nei ṭan a, team hlun leh ropui taksak an siam. Thuneithna hi Walter kuatah awm dawn mah se, team governor atan Jeanie Buss an hmang chhunzawm thung ang.

Tun hmain Boston Celtics chu dollar tlukleh dingawn 6.1 in an lo hralh tawh a, dollar tluklehdingawn 6.05 zetin Washington Commanders an lo hralh tawh bawk, anni pahnih hi United States chhunga infiamna team man tam an ni a, tunah chuan Lakers hian a rawn khum dawn ta a ni.

Kum 2021 khan Mr Walter chuan Lakers-ah hian neitu nihna 20% a nei a, tunah chuan a thunun thei tawh dawn. Lakers bakah hin football club zingah Chelsea tan sum a thawh bawk a, kum 2026 aṭanga Formula 1 team ni tur Cadillac lamah sum a thawh bawk.

Lakers legend Magic Johnson chuan, "Club hian neitu thar a nei dawn a nih chuan Walter hi a ṭha, ani hian infiamna ngaina leh chawisan duhtu a ni a, a ṭha lam zawngin kan ṭhang ngei ang," a ti.