Kum li hrem theih Mudryk

Football Association chuan Chelsea winger Mykhailo Mudryk chu damdawi hman phal loh hmangah an puh a, kum li chhung hrem theih dinhmunah a ding.

Kum 24 mi Mudryk hi December thla khan 'zun test' aṭangin damdawi hman phal loh a hmang tih hriat chhuah a ni a, Ukraine international chuan, " A mak ka ti a, hre reng chunga tihsual ka nei lo," tiin a insawifiah.

November 28, 2024 hnuah Mudryk hi Chelsea tan a la inlan leh lo a, December 1, 2024 hnuah matchday squad-ah a awm leh tawh lo. Ukrainian winger hian team zingah training a nei thei lo a, club erawhin an ngaihven reng thung.

Nilaini khan FA chuan, "Mykhailo Mudryk chuan FA's anti-doping regulations no. 3 leh 4 a bawhchhe ngei tih kan nemnghet. Case kal lai a nih avangin a bak sawi belh a la rem lo," tiin thuchhuah an siam a, hremna a hmachhawn ngei a rinawm.

Blues hian January 2023 khan Shakhtar Donetsk aṭangin Mudryk hi £89mtd-in an la lut a, June 2031 thleng daih contract a ziak. London club tan Mudryk hian inelna hrang hrangah match 73 aṭangin goal 10 a khung a ni.