Last 16-ah Zverev a lut

Alexander Zverev chuan straight set hmanga Marcos Giron hnehin Halle Open khelh laiah last 16 a lut a, quarterfinal thleng tur chuan Lorenzo Sonego a paltlang leh a ngai dawn a ni.

Nilaini zan OWL Arena-a inkhelah, seeded pahnihna Zverev tan harsatna lian tham a awm lo - American player lakah hian 6-2, 6-1 in hnehna a chang a, an intawn hnuhnung paliah Zverev hi a chak vek.

World number 2 Zverev hian French Open lama a duh ang a thlen lohna siamṭhat a tum mek a, season dangah pawh grass court hi inkhelh harsa a tihna zinga mi a ni ṭhin a, kuminah danglam a tum mek a ni.

Halle Open-ah hian Jannik Sinner pawh a inlan a, world number 1 a nih bakah tournament khelh laiah hian seeded pakhatna niin, a match hmasa berah Yannick Hanfmann chu a lo hneh ve tawh bawk.

Wimbledon inbuatsaihna tournament dang Queen’s Club Championship-ah Jack Draper chuan fiahna a paltlang - British number 1 hian Alexei Popyrin lakah set a hloh hmasak hnuin 3-6, 6-2, 7-6 (7/5) in a chak a ni.

Darkar hnih leh minute 13 chhunga hnehna changtu Draper chuan, "Alexei khan a khel ṭha em em a, ka beisei phak bakin hmachhawn a harsa, set hmasa lamah kha chuan ka talbuai tih kha phat theih a ni lo," a ti.

Inkhel dangah Roberto Bautista Agut chuan Jakub Mensik 3-6, 6-3, 7-5 in a lo hneh ve bawk. Queen's Club-ah hian Carlos Alcaraz pawh a inlan - Wimbledon champion lai hi mipui ngaihven ber tiin a sawi ngam.