Champions League Foxes tlawm thei an la awm lo

Premier League champion Leicester City-in Champions League-a an zinkawng duhawm an chhunzawm zel a, Nilaini zan khan khualmualah FC Copenhagen chu 0-0 in an inhnehtawkpui - Champions League chanchina an match hmasa palia goal chhuah miah lo awmchhun an ni.

Claudio Ranieri-a naute hian an match hmasa pathumah hnehna an chan vek avangin last 16 lut turin match hmabak pahnihah point khat bak an mamawh tawh lo. Ranieri-a'n inkhelh
ṭan hmain an hmaah thil ropui tak a inchhawp thu a sawi a, a thusawi thlawp turin Champions League history keu let turin a awm - an match hmasa pathuma hnehna chang thei club 64 zingah last 16 lut lo an awm ngai lo.

Copenhagen tan minute 90-naah Andreas Cornelius-a'n hun ṭha nei mah se Leicester goal-keeper Kasper Schmei-chel chet ṭhat a tawng a, a vanduai. Foxes-in winger Jeffrey Schlupp-a shot per keeper Robin Olsen-a'n a dang hman chu an ui ve khawp ang.

Ranieri thukhawchang

Leicester manager Claudio Ranieri chuan, "Mi-nute 20 hmalam khel
ṭha lo mah ila kan insiam-
ṭha thuai a, kan khelh dan-ah ka lawm a ni. Kasper Schmei-chel hi keeper ropui tak a ni a, ani kan nei thei hi kan vannei a ni. Champions League kan khelh hmasak ber a ni a, a tawp thlengin kan rilru zawng zawng pek kan duh," a ti.

Spurs an tlawm

Tottenham-in an mi-khual Bayer Lever-kusen 1-0 in an ngam lo a, minute 65-naa Kevin Kamp goal 'cool' tak avangin Spurs tan last 16 luh beiseina a tlem ta hle. Mikhual team tan Javier Hernandez-a'n a hun ṭha neih vawi hnih a chhawr thei lo a, Spurs tan Kyle Walker-a'n hun ṭha a khawhral hnuah Eric Dier chuan freekick hmangin bar a pet per bawk. White Hart Lane chei ṭhat a nih mek avanga Wembley-a an home game kheltu Spurs-in hliam vanga chawl mek Harry Kane an mamawh tih hai rual a ni lo.

Spurs manager Mau-ricio Pochettino chuan, "Wembley aia football khelh nana ṭha zawk a awm lo. Buaina chu kan khelhna hmun niloin keimahni hi a ni. Match hmabak pahnih kan la nei a, last 16 lut tur chuan kan chak ve ve a ngai tawh. Chu chu kan ti thei dawn lo a nih chuan Champions League chu kan theihnghilh nghal a ṭul ang. Hmasawn kan mamawh a, chumi tur chuan hun kan nei tam tawh lo," tiin a naute khelh danah a lawm lo hle.