Lammualah Dinthar an hlim
Dinthar FC harhtharna a sang chho zel. Nimin tlai Mizoram Premier League inkhelah Zo United 2-1 in an hneh a, Lammualah Dinthar mipui hlim takin an zai leh ta.
MPL hmasa ber champion Dinthar FC-in Michael Lalrem-ruata hmangin hma an hruai a, Zo United-in H. Malsawmtluanga freekick nalh tak hmangin an sut. Goal hmahruai khungtu Michael-a'n penalty a hlah avangin Dinthar hlauthawng hman mah se hun tawp dawna Nigerian defender Balogun Hammed tauh luh hmangin hnehna an chang.
Dinthar FC-in point 11 hmuin panganaah an inhlang chho a, Zo United erawh point sarih hmuin table mawngphahah an awm chhunzawm zel.
Goal khat ve ve
Zo United-in ball pet thiam an kawl a, minute 13-na leka Mala freekick chu Dinthar keeper Joseph Lalruatfela'n a dang ṭha hle. Dinthar an insiamrem vat a, box chhungah Zo United defender R. Lalthantluanga kutin ball a fuh avangin penalty an beisei a, referee-in a tihhlawhtlin sak lo.
Minute 20-naah Dinthar player thar Cho Tshering Lepcha-a'n dinglam aṭangin ball ṭha tak a vawrh lut a, box chhunga zuang sang ber Michael-a'n a tauh lut nalh hle.
Hemi hnu hian Lalruatpuia'n ṭha takin ball a la lut a, Zo United defender Malsawma Chhangte a inrawlh hman avangin Dintharin an goal hnihna an khung lo.
First half tawp lamah free-kick hmangin Zo United an hlauhawm a, Dinthar an ṭang zo lo. Injury time minute linaah Ruatpuia handball vanga Zo United freekick hlawhchhuah chu Tlangnuam tlangval Mala'n nalh takin a pet lut a, Champhai tlangval Joseph-a dem theih a ni lo.
Chhandamtu Balogun
Zo United-in first half tawp dawna an goal khung vangin phur mah se goal chance ṭha an insiam thei lo.
Dinthar FC che ṭha bik lo mah se Michael-a'n penalty a hlawh chhuak a, amaherawhchu amahin pet zuiin Zo United keeper LK Lalhmangaihzuala'n a dang ṭha hle.
Inhnehtawk mai tura an lan laiin minute 83-naah substitute Steve Lalnunmawia corner pet chu Balogun Hammed-a'n a tauh lut. Zo United lamin nawr let ve bawk mah se an si phurh an sut theih loh avangin an coach Vanlalrova chawlh hnuah an la chak lo chhunzawm zel.
Kan vannei - Lalhlua
Dinthar FC coach Lalhlupuia Sailo chuan, "Kan khelṭha tawk lo a, ṭum dang kan pha lo. Chutichunga point thum kan hmuh avangin kan lawm hle a ni. Referee thutlukna sawisel hi ka duh lo a, mak ka tihlai chu freekick kan chawia kan khingpuite freekick pet ṭha thei lutuk hi a ni," tiin Vanglaini palai a hrilh.
Zo United technical director James Khamliansawma chuan, "Kan khingpuite pawh referee chungah an lawm bik lo ang. Insiamṭhatna tur an ngah a, an thutlukna avanga hnual phahna tur a tam a ni," a ti.
ZoFooty Statistics
Zo United 1 - 2 Dinthar FC
ZUFC : H. Malsawmtluanga 45+4'
DFC : Michael Lalremruata 20'; Balogun Hammed 83'
MoM: Balogun Hammed, DFC
54% Ball Possession 46%
10 Shots 11
2 On Target 6
2 Yellow Cards 2
0 Red Cards 0
Powered By Rainbow Multibrand
Mobile Showroom
Team Dinhmun
# Team Pld W D L GF GA GD Pts
1 Bethlehem VT 9 6 1 2 9 7 2 19
2 Chanmari FC 9 5 3 1 17 8 9 18
3 Chanmari West 9 5 1 3 13 8 5 16
4 Aizawl FC 9 4 1 4 8 6 2 13
5 Dinthar FC 10 2 5 3 11 15 -4 11
6 Ramhlun North 9 3 1 5 9 13 -4 10
7 Chhinga Veng 9 2 2 5 12 14 -2 8
8 Zo United 10 1 4 5 5 13 -8 7
Tute nge inlan?
Zo United (4-3-3) : LK Lalhmangaihzuala; Vanlalruata, Lalnunpuia Pachuau, Malsawma Chhangte, R. Lalthantluanga; H. Malsawmtluanga, C. Laldinmawia, Chhanrinpianga; Malsawmdawnga (Lalhlimpuia 74'), Lalnunsanga, Vanlalremsanga (Lalṭhazuala 57').
Dinthar FC (4-3-3) : Joseph C. Lalruatfela; Vanneihtluanga (Steve Lalnunmawia 46'), Balogun Hammed, Vanlalchhanhima, Zothanzuala; Saihmingthanga (Sandip Alay 62'), Lalbiaknia, Clarence Carter; Cho Tshering Lepcha (Samuel Laltlanthanga 82'), Michael Lalremruata, Lalruatpuia.