Djokovic leh Murray chak nuamsa

Novak Djokovic-a'n Paris Masters second round paltlang turin Gilles Muller lakah harsatna a nei lo a, a elpui Andy Murray erawhin Fernando Verdasco lakah fiahna hautak a hmachhawn nghal thung.

Nilaini zan inkhelah world number 1 Djokovic hian Muller lakah hian darkar khat leh minute 20 chhungin 6-3, 6-4 in hnehna a chang a, world number 1 hian tun season-a match 60 hnehna a channa chiah niin a zawnin kum 10 chhung zet chu season tinin match 60 hnehna a chang tling ziah.

World number 2 Murray-a'n Spain tlangval lakah awlsam takin hnehna a chang mai bik lo, inkhel inhnehtawk takah darkar hnih leh minute 29 chhung an inbeih hnuah 6-3, 6-7 (5-7), 7-5 in hnehna a chang hram - Britain tlangval hian ATP number 1 nih tumin kawng dik a zawh zel.

Inkhel dangah Japan tlangval Kei Nishikori chuan professional tennis a khelh hnua a vawi 300 chak nan Viktor Troicki chu 6-2, 7-5 in a hneh a, seeded ni phak zingah Jo-Wilfried Tsonga, Marin Cilic, Lucas Pouille leh David Goffin te pawhin an khingpui
ṭheuh an hneh bawk.