Zan danglamah inkhel pawimawh Chanmari West Vs Aizawl FC

Mizoram Premier League inel-na a sang tihchianna chu a zawna vawi hnih champion tawh Aizawl FC an talbuai a, I League club hi semifinal lut lo thei dinhmunah an ding. K. Malsawmkima hote hian zanin dar 7:00 hian Champhaia an hneh tawh loh Chanmari West an hmachhawn dawn a, HC Zarzoliana hote hi table-ah a chung zawka an awm avangin dah hniam theih an ni lo.

Zan danglam chu

Lammuala hun hnuhnung hman duhtu Jumbo/Zama (Herbert Winston Vaughan) pualin Mizoram Football Association chuan zanin MPL inkhelah hun an hmang dawn a, he hunah hian mi zawng zawng tel turin an sawm.

August 2, 1926-a piang British pa Jumbo hian a thih hmain thurochhiah a neia, chutah chuan, "Ka vanglaia ka hun hmanna hlimawm ber chu Lammual a ni a,Lammualah ngei hian ka pualin thil lo ti rawh u," tiin a sawi.

Jumbo duhthusam chu MFA lamin an tihhlawhtlin sak dawn a, zanina tualchhung football ngainatu Jumbo-a puala hun hman hunah hian England leh khawvel hmun dang aṭangin Jumbo tu leh fate mi 27 te an rawn tel ang.

Goal khat a tawk

Chhangphut Field-ah Aizawl FC defender Lalṭhakima'n West Warrior captain Laldampuia ball cross chu an lamah a tlawh lut palh a, he goal hi Chanmari West-in point thum hlawhchhuah nan an hmang.

Aizawl FC-in Champhaia point an hloh hnuin Chhinga Veng an hneh a, ngai an awh dawn chauh tihin I League club hi Ramhlun North lakah an chak lo. Tun season-ah AFC hi an talbuai hle - an chak chhunan pawh 'vanneih chak' tia puh theih a awm zauh zauh.

Chanmari West lam hi AFC an hneh hnuah Ramhlun North hneh thei mah se Bethlehem VT lakah inhkhel thunun chungin point an hlawh chhuak lo. Semifinal lut tura dinhmun ṭha zawka ding turin zanin hian chak an mamawh.

Benjamin leh Chullova

Aizawl FC thu chhuakin Nige--ria tana inlan tawh nia an sawi midfielder Benjamin Onome chu West Warrior hmachhawn turin a inpeih tawh a, hei aia thu lawmawm zawk chu Lalram-chul-lova'n tlarhnung a ho tawh dawn.

Mala hote buaina ber erawh goal khung a ni a, tun season match ngaah goal an khung lo. Chung zingah chuan Dinthar FC lakah point khat an hlawh chhuak a, Ramhlun North, Chanmari West FC, Chanmari FC leh Bethlehem VT te erawh 1-0 vekin an hneh lo.

AFC coach Mala chuan, "Team zawng zawng an ṭha vek a, kan inthlauhna a tam lo. Chuvangin point thum hmu turin theihtawp kan chhuah a ngai a, Chanmari West lakah kan theihna zawng zawngin kan khel ang. Chak kan duh," tiin chak ngei an tum thu Vanglaini palai a hrilh.

West Warrior tan Dampuia

Chanmari West captain Lal-dam-puia'n goal ruk khung tawhin MPL khelh mekah a la pet goal tam ber a, R. Laldanmawia (goal 3) leh Lalmuanzuala (goal 2) ten an thlawp ṭhat bawk avangin Aizawl FC tlarhnung tan buaina tham an ni.

West Warrrior boss Zara'n MPL hmasa berah Dinthar FC a champion pui tawh a, MPL champion dan a hriat ang bawkin Aizawl FC hneh tura an mamawh a hre bawk. Hei vang tak hian Zara enkawl Chamari West leh Mala kaihhruai Aizawl FC inkhel hi a hmuhnawm ang.