A chung bera awm tur zawnna Bethlehem Vengthlang Vs Chanmari
Chanmari FC-in an elpui Bethlehem Vengthlang FC aṭangin an coach Lal-sangzuala Hmar an chhuhsak a, football ngaina veng BVT an buai phah lo.
Mizoram Premier League Season 5-a match kaw khelh zawhah BVT hi hmahruaitu niin vawiin tlai dar 3:00 hian anmahni aia point khat chauha hmu tlem Chanmari FC an hmachhawn dawn, a chak zawk hi table chung berah an awm ang.
Chhangphut Field phuba
October 6 khan Chanmari FC-in Chhangphut Field, Champhaiah MPL5-a hneh loh la tawng lo Bethlehem Vengthlang FC chu 4-1 in an sawp. MPL2 champion tan hian Lalruatfela Zote, Lalrammawia, Malsawmfela leh Vanlalbiaa Chhangte ten goal an khung laiin BVT tan PC Zosangliana chiahin a khung.
Lalbiaksanga Colney hote mual-photirtu hi BVT coach hlui Sanga kaih-hruai team an ni a, BS-a tan result hriatreng tlak loh theihngilh nan vawiin hian phuba a lak a ṭul ang.
Semifinal ticket
Chhiarkawp dan ang thlapa semifinal lut tur chuan match dang la nghah chu a la ngai dawn a, chu ti chung chuan vawiina chak zawk hi chuan semifinal ticket an nei tawh tura ngaih a ni.
Chanmari FC-in tlarhma tichak tura an biak fel Ivorian forward Leonce Dodoz la inlan thei lo mah se defender Umunnakwe Ugochukwu Godswill an chhawr thei tawh. Kolkata club Peerless SC aṭanga lakluh Nigerian defender hian tlarhnung a tihchak ngei a rinawm a, Malsawmfela leh Fela Zote te tlarhma lamah an hlauhawm phah sawt bawk ang.
BVT lamin Samson Ramengmawia leh Laldinliana Varte bakah defender pahnih Lalhruaitluanga leh Joseph Lalsanglura te an neih belh avangin an squad a chhah sawt tih a chiang. Tunah chuan Champhaia inlan BVT kha an dang tawh a, an ṭha sawt em tih chu tlai lamah a chiang ang.
Dinthar aṭanga tehin
BVT-in inhliam vanga an buai lai takin Dinthar FC phur thar an hmachhawn a, MPL1 champion-in hmahruai mektu BVT hi 2-0 in an hneh.
Chanmari FC hi inchhuang tur an ni bik lo a, MPL2 champion hian Dinthar FC lakah point khat bak an hlawh chhuak thei bik lo. Dinthar aṭanga tehin Chanmari an ṭha hret a, amaherawhchu hemi hnu hian BVT-in player an lakluh leh tawh bawk avangin an intluk tawk viau tura ngaih a ni.
Kan phur lai - BVT coach
BVT coach Lalbiaksanga Colney chuan, "Player thar kan nei a, kan phur thar lai tak a ni bawk. Point thum hmu turin kan la tuihal reng a, ṭan phat
aṭanga draw game khel turin game plan ka siam ngai lo. Chanmari hneh tumin kan khel ang," tiin chak ngei a tum thu a sawi. BS-a hian BVT mipui chu inkhel en turin a sawm bawk.