Jeje-a mawi zanah Sena a tê bik lo

Indian Super League-ah Mizo hming a mawi zel e - Nilaini zan khan Chennaiyin FC leh Mumbai City chu goal khat ve ve khungin an inhnehtawk a, Chennai club tana goal khungtu Jeje Lalpekhlua chu Hero of the Match atan thlan niin Mumbai City defender Lalhmangaihsanga Ralte chu Emerging Player of the Match atan thlan a ni.

Chennaiyin tan Jeje Lalpek-hlua'n minute 51-naah goal hmahruai a khung a, Italian forward Maurizio Peluso corner pet chu Mumbai City defender palian ven karah a tauh lut. Minute nga hnuah Jeje-a'n hun ṭha neih chhunzawm mah se Bethlehem Veng rawlthar Jerry Lalrinzuala siamsak chu goal-ah a chantir thei lo.

Mualneitu Chennaiyin hlauh--awm chhunzawm mah se Jerry-a ball cross Jeje-a'n a pet hmaa Lucian Goian-a'n a tackle hman te, Nigerian striker Dudu Omagbemi-a'n goalkeeper chauh a hmachhawn hnua goal a khung theih lohte an tuar a, hun tawp nan minute hnih chiah a awm tawh tihin Mumbai City midfielder Leo Costa chuan an siphurh sut nan goal ropui a khung.

Jeje lawm a kim lo

Jawaharlal Nehru Stadium, Chennai-a mipui 22,000 pungkhawm hmaah khawvel huapa striker lar Diego Forlan pawh inlan mah se Atletico Madrid striker hlui ai pawha langsar zawk chu Hnahthial tlangval Jeje Lalpekhlua a ni a, hetichung hian Mizo striker lawm a kim lo.

India international striker chuan, "Goal ka khung avangin ka lawm a, hnehna chang thei reng kan nih laia point thum kan hmuh loh vang erawh chuan lawm a kim lo," tiin a sawi a, Jeje chuan match a bichilh hlawm avangin coach Marco Materazzi chuan tlarhma lamah players a inkhelh chhawktir ṭhin thu Vanglaini palai a hrilh bawk.

Sena a vul

Season hmasaah Lalhma-ngaihsanga Ralte hi Chein-naiyin FC tan a khel a, tun season-ah erawh Mumbai City a pan. Tun season-ah vawi thum Emerging Player of the Match-ah thlan a ni tawh.

MFA sub junior leh junior team-a inchher hriam, chumi hnua Royal Wahingdoh lama professional football khel ta North Mualcheng tlangval chuan, "Ka vannei a, Pathian malsawmna ka dawng a ni. Nikum aiin tun season-ah ka
ṭang zawk a, tun dinhmun hi ka thlen theih phah niah ka ngai. Pathian zarah ka inhliam lo a nih chuan hmun pawimawh chan chhoh zel pawh ka beisei a ni," a ti.

Sena hian Italy defender hlui Materazzi hnuaia khelh ai chuan World Cup 2002 leh 2006-a Costa Rica coach Alexandre Guimaraes enkawlna hnuaia khelh chu nuam a tih zawk thu Vanglaini palai a hrilh bawk.