Real an chelh niah Dortmund an tlang

Nilaini zan inkhelah Real Madrid tan Gareth Bale chuan Legia Warsaw lakah Champions League-a goal rang ber khung mah se hnehna chang zo loin 3-3 in an inhnehtawk a, last 16 lut turin an nghah rih a la ngai. Inkhel dangah Borussia Dortmund chuan Sporting Lisbon 1-0 a hnehin knock out round an inpet kai thung.

Goal rang ber

Champion lai Real Madrid hi 5-1 a an sawp hnu hmachhawn an nih avangin inkhelh ṭan hma chuan chak chiang zawk tura ngaih an ni, inkhel ṭan aṭanga second 57-na lekah khawvela player man to pahnihna Bale-a'n Champions League chanchina goal rang ber khungin a club hma a hruai pui. Wales forward Bale hian minute 35-naah Karim Benzema goal khung tur a siamsak bawk - Zinedine Zidane-a'n match 100 a enkawl tlin niah Real hi chak chiang tura ngaih an ni lehzual.

Polish Army Stadium-ah inkhel entu an awm lo a, hei hi Warsaw in an group match hmasa bera Dortmund 6-0 a an hneh loh
ṭuma fan-ten tharum thawhna lam hawia buaina an siam vang a ni. Besei loh takin Polish club hian Vadis Odjidja-Ofoe leh Miroslav Radovic te hmangin an si phurh an sut zo a, minute 83-naah Thibault Moulin chuan an goal thumna a khung bawk.

Mahse, Warsaw lawm chhung a rei bik lo. Goal an phurh
aṭanga minute hnih hnu lekah Real midfielder Mateo Kovacic chuan he inkhela goal hnuhnung ber chu khungin team pahnih an inṭaṭhen.

Real Madrid manager Zi-dane chuan, "Goal hniha hma kan hruai hnuah kha chuan kan thawhhona ṭha se la chuan awmlsam taka hnehna chang mai thei tur kan ni," tiin a naute khelh danah a lawm tawk loh thu a sawi. French manager hian last 16 luh mai niloin group hmahruaitu nih chu an tum ber a la nih thu a sawi tel bawk.

Dortmund an tlang

Striker Pierre-Emerick Auba-meyang chu Sporting Lisbon hmachhawn tura ngaih ni mah se squad aṭanga dah chhuah a ni a, a aiawhtu Adrian Ramos chuan minute 12-na lekah goal awmchhun a tauh lut. Dortmund boss Thomas Tuchel chuan kum 27-a upa an striker a chhawr loh chhan chu club chhung lam buaina vang a nih thu a sawi a, kartawp Bundesliga inkhelah chuan a inlan tur thu a sawi tel bawk.

Dortmund hian kumin Champions League-ah hneh loh an la tawng lo a, Warsaw an sawp hnuah Real Madrid nen an inhnehtawk a, khualmual leh Signal Iduna Park-ah Lisbon hnehin Group F aṭanga last 16 lut thei hmasa ber an ni.

Borussia Dortmund coach Tuchel chuan a striker chung-chang sawiin, "Ani tel loa team din kha thil harsa leh khirhkhan tak a ni a, a khelh loh chhan hi chhunglam thil a ni a, chhunglam thil a nih avangin sawi zau ka duh lo. Inrinnia Hamburg nen kan inkhelh hunah chuan a lo kir leh tawh ang," a ti. Gabon forward Aubameyang hian tun season-ah a club tan hian inelna hrang hrangah match 13 aṭangin goal 10 a khung tawh.

Juve chak zo lo

Italian champion Juventus-in last 16 lut tura an hun ṭha neih an chhawr ṭangkai thei lo a, team nem zawka ngaih Lyon lakah Gonzalo Higuain penalty chhuih luh hmangin minute 13-na lekah hma hruai mah se French Ligue 1 club tan Corentin Tolisso chuan hun tawp dawnah a sut.

Juve hian tun season Cham-pions League match li an khelh tawhah chak loh an la nei lo a, Tolisso-a goal khung chiah kha an lamah goal a la lut. Italy international Gianluigi Buffon chuan Champions League-a a match 100-na khelin he inelna bik a vawi 42 zet clean sheets a neih tawh chu a neih belh teuh hle.

Juventus coach Massimi-liano Allegri chuan, "Kan player pawimawh ṭhenkhat an chawlh a ṭul avang leh inkhel pawimawh kan hmachawn zawn ngun deuh avangin a awlsam lo a, chutihrualin point thum kan hmu lo erawh a lungawithlak loh hle. Turin-a inkhel kan ni a, dinhmun ṭha zawkah kan ding bawk, goal an rawn khung hnuah kha chuan kan tan insiam ṭhatna hun a awm tawh lo," tiin a naute khelh dana a lawm loh thu a sawi.

Group H inkhel dangah Spanish club Sevilla chuan an mikhual Dinamo Zagreb chu 4-0 a sawpin last 16 lut turin an dinhmun a ṭha tawh hle. Jorge Sampaoli naute hian Luciano Vietto goal hmangin hma an hruai a, Croatian club midfielder Petar Stojanovic chu first half hmaa hnawhchhuah niin La Liga club hian Sergio Escudero, Steven N'Zonzi leh Ben Yedder te hmangin goal an khung belh bawk.