Barca hnuaichhiahtu Gundogan

Spanish champion Barcelona laka 3-1 a chak hlim Manchester City midfielder Ilkay Gundogan chuan Catalan club lakah khan 4-1 emaw 5-1 tala hnehna chang thei an nih thu a sawi. German midfielder hian Barca an hneh ṭum hian goal hnih a khung a ni.

Germany midfielder chuan, "Kan tan chuan hnehna ropui tak a ni a, kan si phurh kan sut hnua kan khelh dan kha a ropui takzet a ni. Hna ṭha takin kan thawk a, goal khung theihna hun ṭha vawi tam kan nei a ni," a ti.

City hian first half-ah Lionel Messi goal khung hmangin si phur hmasa mah se chawlhlawk hman a nih hmain Gundogan hian an si phurh sutna goal a khung a, second half-ah goal khat dang khung lehin Kevin de Bruyne chuan goal khat a thawh ve bawk.

Gundogan chuan chawlhlawk an hman laia manager Pep Guardiola thusawi chungchang sawi nghalin, "Pep khan a sawi zawng chu hma kan sawn theih dan tur a ni mai. Kan khelh dan avangin kan chungah a thinrim lo a, Messi, Luis Suarez leh Neymar dan tum chu thil theih loh deuhthaw a nih thu ani pawhin a hria a ni," tiin Barca kha hneh lo pawh nise thil zahthlak a nih loh thu a sawi.

Borussia Dortmund mid-fielder hlui chuan Champions League-ah chuan engpawh thleng thei a nih thu sawi nghalin, "Thil theih loh tak tak a awm lo. Kum 2013 Champions League final-ah khan Dortmund khan luh kan inbeisei lo a, semifinal-a Real Madrid hneh kha kan inbeisei lo," tiin hmasawn tur chuan hun a duh thu a sawi bawk.