Liverpool striker Danny Ings-a season a tawp

Liverpool striker Danny Ings chu a khup hliam vangin thla kua tal a chawlh a ngai dawn a, English striker hi tun season-ah chuan a hmel kan hmu tawh dawn lo. Kum 24-a upa striker hian kar hmasa EFL Cup-a Tottenham Hotspur an hneh
ṭumin a khupah hian hliam a tuar a ni.

October 2015-a a khup hliam vanga thla sarih chhung zet lo chawl tawh Danny Ings chungchang sawiin Liverpool boss Jurgen Klopp chuan, "Danny hliam hi pawi kan ti takzet tih hian kan rilru hnualna a phawrh chhuak zo kher lo ang. Player ṭha leh thawkrim tak a nih avangin tuna a dinhmun hi chu a phu hlawl lo a ni," a ti.

Klopp chuan sawi chhun-zawm-in, "Danny hian a team tan ball chhuhlet a tumna lamah a khupah hliam hi a tuar a, khelmual chhung leh pawn lama team tan theihtawp chhuah ṭhin a nih avang erawh chuan a hmaa a lo tih tawh ang thoin ṭha takin a lo kir leh ang tih ka ring a ni," tiin a sawi.

Ings hian June 2015 khan Burn-ley aṭangin Liverpool hi a zawm a, hliam vanga vawi 11 chauh la inlan theiin goal li a khung sak tawh. A hliam dam hnuah Klopp hnuaiah hmun a chang tam tawk lo a, tun season-ah vawi hnih chiah a la inlan.