Man United manager Mourinho an hrem

Manchester United manager Jose Mourinho chu tun hnaia a chet dan mawi lo avangin Football Association chuan match khat chhung a team kaihruai thei lo turin an hrem a, £58,000 chawiturin an ti bawk.

Portuguese manager hi Burnley nen an inhnehtawk ṭuma match official laka ṭawngkam mawi lo a hman avangin £8,000 chawitir a ni a, Pathianni zana Swansea City an lenchilh hunah a team a kaihruai thei lo bawk ang. Mourinho-a'n £50,000 a chawi chhan hi Liverpool nen an inkhelh hmaa FA dan palzuta referee chungchang a lo sawilawk vang a ni thung.

FA thuchhuak chuan Mourinho hian match official lakah ṭawngkam mawi lo a hmang tih a pawm a, game zahawmna ti bawrhbanga puhna erawh a pha thung niin an tarlang a, a hma hun zel atan fimkhur turin Chelsea boss hlui hi hriattir a ni bawk.

Mourinho-a'n United boss a nih hnua a chhawr duh loh midfielder Bastian Schweinsteiger chu first team training a zawmtir leh tawh a, hemi hma hian German midfielder hian Under-23 zingah a nih loh chuan mimalin training a nei ṭhin. Real Madrid boss hlui chuan first team zinga Basti a training tir leh ta chu thutlukna pangngai ve mai a nih thu a sawi.