India-in Australia an hneh

Australia-in Test match hmasa berah mikhual India lakah zahngaihna an lantir lo a, wicket riatin hnehna an chang. Test match vawi hnihnaah captain Virat Kohli a awm loh avangin Men in Blue an mangang a, mahse Kohli aiawha captain hna chelhtu Ajinkya Rahane chu chhandamtu a ni.

India hian Melbourne Cricket Ground-a khelh Test match vawi hnihnaah hian wicket riatin hnehna an chang let a, series-ah 1-1 in an inhnehtawk. Test match hi vawi li khelh tur a ni a, a vawi thumna hi January 7-11, 2021 khian khelh a ni ang.

Inkhel chu 

Ṭhumvawrah Australia an vannei a, bat hmasak an thlang. First Inninings-ah Aussies batsman te aiin India bowler-te an che ṭha zawk. Australia tana run siam tam ber Marnus Labuschagne-a'n run 48 a siam a, Travis Head (38) leh Matthew Wade (30) ten run 30 siam tling bawk mah se run 195 chiah an vaw chhuak.

India bowler chhuanvawr Jasprit Bumrah-a'n run 56 pein wicket li a la a, Ravinchandran Ashwin-a'n wicket thum lain run 35 a pe. Mikhual team tan beiseina a awma, beiseina chu a tak rama chantir turin captain Rahane a rawn pen chhuak.

Rahane hian century (112) a rawn siam a, Ravindra Jadeja-a'n half century (57) rawn siam bawkin India-in run 326 an siam. Second innings-ah India bowler-te an che ṭha rual a, Australia batsman chu run 200 siamtirin an vawm hlum vek.

Indian bowler Mohammed Siraj (37/3), Bumrah (54/2), Ashwin (71/2), Jadeja (28/2) leh Umesh Yadav (5/1) ten wicket an la vek a, hnehna chang turin second innings-ah run 70 chauh siam a ngai. Mayank Agarwal (5) leh Cheteshwar Pujara (3) ten run tam siam lo mah se Shubman Gill (35*) leh Rahane (27*) ten thi loin target an vaw chhuak.

Fak phu Rahane 

Ajinkya Rahane-a'n Kohli hmunruak a luah khat hneh a, man of the match-ah thlan a ni. Second Test-ah hian batsman Shubman Gill leh bowler Mohammed Siraj te khelhna hmun pek an ni a, an che ṭha ve ve.

India captain Rahane chuan, "Gill leh Siraj te an che ṭha. Gill hian first class cricket-ah record ṭha tak a nei a, Siraj hi a rilru a paukhauh bawk. Team anga kan thil tumte kan hlawhtling a, ka lawm hle a ni," tiin a sawi a, Third Test-ah Rohit Sharma a tel theih a beiseiawm.

Australia captain Tim Paine chuan, "A lungawithlak loh a, kan khel ṭha lo. India anga team ṭha laka kan chesual a nih chuan hrem kan ni zel ang. Match khelh hmabak a la awm a, kan insiamṭha thei ang," tiin a sawi ve bawk.