Number 1 Jannik Sinner a chak lo

Jannik Sinner chuan a duh angin Wimbledon inbuatsaihna a nei ṭha thei ta lo - mipa tennis world number 1 hian Alexander Bublik an hneh loh avangin Halle Open second round lekah a zinkawng a tawp.

Ningani zan inkhelah Sinner hi chak tura rinkai zawk a ni. Mahse, world number 45 lakah hian 3-6, 6-3, 6-4 a chak loin a nomawi a humhim thei dawn ta lo, world number 20 aia hniam lakah match 66 chhung a chak zawn tawh record chu a tawp ta a ni.

Italian tlangval Sinner hi French Open khelh zawh takah khan pahnihna a ni, nomawi inchuhna inkehlah Carlos Alcaraz a ngam lo. Paris khawpui aṭanga a haw hnuah Halle Open hi insiamṭhat nan hman a tum thu a sawi a, mahse a duh ang vekin thil a thleng bik ta lo a ni.

Inkhel dangah Alexander Zverev erawh a chak - German star Zverev hian Lorenzo Sonego chu 3-6, 6-4, 7-6 (7-2) a hnehin quarterfinal a lut a, nizan khan Flavio Cobolli nen inkhel zui lehin result erawh kan hre hman lo.