Australian Open khel lo tur Federer

Roger Federer chu vawi ruk a champion tawhna Australian Open-ah a inlan thei dawn lo. Swiss star hi a khup hliam dam tawh mah se inkhel turin a la inpeih tawk lo tihna a ni.

Melbourne kawpuia inelna hi January thla a khelh tur ni mah se February 8 aṭanga khelh turin an sawn a, inelna neih hun sawn tlai mah se Federer tan a la hma lutuk deuh.

Tournament director Craig Tiley chuan, "Roger tan a hun a la hma lutuk deuh a ni. Grand Slam khel turin a la inpeih tawk lo," a ti. Federer hian professional tennis a khelh chinah Australian Open hi a la khel ziah a, a inlan loh vawi khatna tur a ni dawn.

Australian Open-ah hian Novak Djokovic leh Rafael Nadal te chu inlan ngei tura ngaih an ni. Grand Slam champion hnem lamah Nadal (20 titles) nen an intluk mek a, Spanish star hian record thar siam theihna hun ṭha a nei dawn tihna a ni ang.