Damdawi in aṭangin Mbappe a chhuak

Kylian Mbappe chuan damdawi in a chhuahsan thei ta a, Real Madrid forward hian Club World Cup a khel ve thei dawn em tih erawh sawi chian theih a la ni lo thung.

Mbappe hi a khawsik vangin enkawl a ni a, an match hmasa bera Saudi Arabian club Al Hilal nen an inhnehtawk ṭum pawhin a inkhel ve lo a, coach Xabi Alonso chuan a player hi inkhel thei chi a ni lo tih a sawi a ni.

Real Madrid chuan thuchhuah siamin, "Mbappe chu uluk taka enkawl chhunzawm a ni dawn, a theih anga hmain a ṭhiante a zawm ang," an ti a, a inkhelh theih dawn leh dawn loh erawh an la sawi rih lo.

Spanish club lian hian Alonso hoin indinthar leh an tum mek - Club World Cup hi an tan inbuatsaihna pakhat a ni. Pathianni zan dar 12:30 hian Mexican club Pachuca an hmachhawn leh ang.