Quarterfinal-ah Alcaraz a lut

Carlos Alcaraz chuan Queen’s Club Championship 2025 khelh laiah Jaume Munar hnehin quarterfinal a lut - Spanish star hian Munar lakah hian fiahna paltlangin 6-4, 6-7(7), 7-5 in a chak.

French Open khel zo hlim a ni a, a taksa a la chau ve tih pawh a hriat - Alcaraz tan London khawpuia inkhelh chhunzawm nghal a awlsam lutuk lo, set hnihna hloh mah se harsa takin a tawpah hnehna a chang ta tho.

World number 2 Alcaraz chuan, "Jaume Munar kha hmachhawn a harsa em em a, player ṭha leh khauh tak a ni chiang hle. Mipui khan min thlawp ṭha em em a, anmahni avang chauhin ka chak niin ka hria.

"Darkar thum chuang kan inkhel a, a hun rei zawng hian a awlsam lohzia chu a ti lang chiang hleah ka ngai," tiin a sawi. Queen’s Club Championship-ah hian 2023 khan a lo champion tawh, kuminah nomawi chawi leh ngei a beisei mek.

Queen’s Club Championship hi Wimbledon inbuatsaihna tournament zingah chuan a langsar pawl a ni. Alcaraz hian a match lehpekah chuan Arthur Rinderknech a hmachhawn leh ang, ani hian inkhel dangah Reilly Opelka chu 7-5, 7-6(3) in a lo hneh ve thung a ni.

Alcaraz hi a zawna Wimbledon champion thei a ni a, kuminah pawh rinkai ber a ni leh dawn; atan chuan Queen’s Club Championship hi inbuatsaihna ṭha tak a ni leh ngei ang.