IPL-a chak aiin England-a chak a hlu zawk- Shubman

India captain thar Shubman Gill chuan England-a hnehna chan chu Indian Premier League-a hnehna chan aiin a hlut zawk thu a sawi. Nimin tlai aṭang khan India leh England hian Test match vawi nga an khelh tura hmasa ber chu Headingley Carnegie, Leeds-ah an khel ṭan.

IPL-a Gujarat Titans champion pui tawhtu Shubman Gill chuan, "England zin ṭuma captain theihna hun ṭha hi a awm meuh lo a, vanneih ṭum a nih chuan vawi thum te chu a ni thei mahna. Chutihrualin IPL erawh kum tina thil thleng a ni a, chuvangin ka tan huan England-a hnehna chan hi ka ngai hlu zawk," tiin a sawi.

India hian England-a Test series-a hnehna an chan hnuhnun ber chu kum 2007 daih tawh kha a ni a, 1-0 in an chak. Kum 2021 khan 2-1 in hma hruai mah se match tawp bera an chak loh vangin 2-2 in an inhnehtawk.

Rohit Sharma leh Virat Kohli ten inkhelh an chawlhsan tawh avangin an tel tawh lo a, player ropui pahnih chungchang sawiin Gill chuan, "IPL-ah an pahnih nen hian inbiakna remchang kan nei ve ve. England-a an tawnhriat te min hrilh a, harsatna kan hmachhawn tur thlengin min hrilh. Keimah ngei pawhin India-ah chuan England ka hmachhawn tawh a, 4-1 a kan hneh ṭum kha ka hun tawn ngaihhlut zinga mi a ni," tiin a sawi.