Ka tan insiamṭhat hun a ni - Bagnaia

Pathianni tlai dar 5:30 hian MotoGP intlansiak a awm dawn - Italian Grand Prix an tlan tur hi Francesco Bagnaia chuan atan insiamṭhat theihna hun remchang ṭha a nih tur thu a sawi.

Italian rider Bagnaia hian kum 2022 leh 2023 khan MotoGP nomawi a chawi a, season hmasa khan pahnihna dinhmun a luah; tun season kal laiah pathumna a ni mek, a chungah Marc Marquez leh Alex Marquez te an awm.

An rama inelna an neih tur thlirlawkin Bagnaia chuan, "Aragon-ah khan ka tlan ṭha em em a, duhthusam vek ni lo mah se a ṭha tawk hle. Amaherawhchu, ka hmaah Ducati rider pahnih an thleng thung.

"Tih ṭhat viau pawha hnehna kan chang lo a nih chuan hmasawn kan ngai tihna a ni, tunah chuan kan ramah inelna kan nei dawn. Ka tan chuan season kal laia indinthar lehna remchang ber a ni tura ngaih a ni.

"Marc hian season a hmang ṭha em em a, elphaktu nih pawh a harsa tih ka hria. Mahse, champion tuma inel vek kan ni a, a tir aṭanga che fuh hmasa zawk nih ngei pawh ka tum ang, intlansiak tak hmain qualifying aṭanga thapui thawh a ngai dawn," a ti.