A vawi hnih nan Alcaraz a champion

Carlos Alcaraz chuan season duhawm a hman chhunzawm, a vawi hnihna atan Queen’s Club Championship nomawi a chawi leh ta - Wimbledon an khelh dawn hnaih avangin atan boruak a nuam zual ngei ang.

Pathianni zan khan London khawpuiah final khelh niin, world number 2 Alcaraz a khingpui Jiri Lehecka chu 7-5, 6-7(5), 6-2 in a hneh. Queen’s Club-ah a champion vawi hnihna a nih bakah hian, tennis a khelh hun chhungin nomawi 21 a chawi tling ta bawk.

Kum 22 mi Alcaraz chuan, "A nihna takah chuan he hmunah hian champion ka beisei phak lo. Grass court-ah nuamti taka inkhel turin ka pan tawp mai a ni a, a tawpah nomawi ka dawm zui avangin ka lawm a zual hle.

"Ka tan chuan tournament danglam leh hlu bik tak a ni, a vawi hnih nana champion phei chu a hlu zual," a ti a, a hmuna entu lamin a beisei phak baka ṭhain an thlawp bawk, atan hmun nuam a ni chiang ang.

Kumin February thla a khelh zawh tak Qatar Open-ah khan, quarterfinal-ah Alcaraz leh Lehecka te hi an lo intawng tawh a, set thum an khelh hnuah Lehecka a chak; tun ṭumah erawh thawnthu a danglam ta a ni.

Kum 23 mi Lehecka chuan, "Final ka khel thei kha ka lawm a, khawvela player ṭha berte zinga mi nen kan inhmachhawn bakah set ka la thei kha lawmna tur a ni. Champion tumin theihtawp ka chhuah, mahse a tawk zo si lo. Carlos ka lawmpui hle," a ti.

June 30 aṭanga July 13 chhungin Wimbledon an khel leh dawn a, grass court inelna lian berahb Alcaraz hi seeded pahnihna a ni ang; a chungah world number 1 Jannik Sinner a awm thung ang.

Grand Slam vawi nga champion tawh a ni a, tawnhriat a nei ṭha thawkhat tawh - Alcaraz hian April hnu lamah match 28 khelin vawi khat chiah chak loh a nei; All England Club an luh hunah pawh rinkai ber a chhal ngam a ni dawn.