MBBA Inter Veng Basketball-ah team 63 tel dawn

Mizoram Basketball Association (MBBA) buatsaih tur veng/khua inelnaah team 63-in hming an pe a; June 27, Zirtawpni hian draw neih a ni ang.

Mizoram pum huap inelna ni mah se Aizawl khaw pawn aṭangin team pathum Champhai Kahrawt, Champhai Vengthlang leh Thenzawl East te chauh an tel dawn.

Chutihrualin team 63 zetin inelna an hmachhawn dawn a, ngaihven a hlawh ang. Mizoram pum huap inelna hi tun hnaiah MBBA-in a buatsaih loh avangin seeded an siam dawn lo a, team ṭha pawh an inhmachhawn thei nghal dawn tihna a ni.

MBBA hian tun hmain Central YMA nen veng/khua basketball inelna a buatsaih ṭhin a, kum 2018 hnuah CYMA nen ṭangkawpin inelna a buatsaih tawh lo. Kum 2018-a inelna neih a nih hnuhnun ber khan team 66 an tel a, Khatla South chuan 84-77 a Khatla hnehin an champion.

Kum 2023 khan Chhinga Veng Branch YMA chuan an veng Golden Jubilee pualin CYMA leh MBBA hriatpuiin Chhinga Veng Branch YMA Diamond Jubilee Thanpari Pautu Memorial Inter Branch YMA Basketball Tournament an buatsaih a, Ramhlun North chuan final-ah Khatla South hnehin an champion.

Tun ṭum inelnaah hian seeded hi awm lo mah se, veng/khua inelna hnuhnunga che ṭha Khatla South, Khatla, Ramhlun North, Bungkawn, Kanan, Bethlehem Vengthlang, Zarkawt, Tuikhuahtlang leh Nursery te chu team tum châkawm loh zingah an tel ang.

MBBA buatsaih inelna hi July 3, Ningani aṭangin R. Dengṭhuama Hall, Mualpuiah khelh ṭan a ni ang.