Medvedev hnehin Bublik a champion

Wimbledon inbuat-saihna tournament zinga pakhat Halle Open khelh zawh a ni a, rinkai zawk Daniil Medvedev hnehtu Alexander Bublik a champion; grass court inelnaah hian nomawi a chawi vawi khatna a ni.

Tun hmain Bublik hian Medvedev hi a hneh ngai lo, an intawn tawhna parukah a chak lo zawkah a ṭang vek. Mahse, Pathianni zan final-ah erawh thil a danglam ta, seeded pathumna hi 6-3, 7-6(4) a hnehin a record ṭha lo tak chu a thai bo.

Kum 28 mi Bublik chuan, "Season hmasa Wimbledon kan khelh zawh aṭang khan tennis khelh nuam ka tihna a tlahniam em em a, inkhelh chawlhsan mai duh chang pawh ka nei hman hial.

"Mahse, season kan hmang cho leh mek a, tunah chuan kan tan hun ṭha a inher chhuak ve leh mek niin ka hria. Daniil hi chu player ṭha bik a ni a, a bik takin ka tan hmachhawn a harsa zual, tunah erawh a vannei zawk ka ni," tiin a sawi.

Kazakhstan tlangval Alexander Bublik hi world number 17 pawh lo ni tawh a ni a, mahse season hmasa khan nasa taka tlahniam in number 75 te a ni hial; tun kara ranking chhuak tharah erawh a sang zual 30 zingah a tel leh tawh ang.