Man City 'thar' ri ruang a lang ṭan

Season hman zawh taka nomawi chawi lo Manchester City-in Pep Guardiola hoin team thar din an tum a, FIFA Club World Cup-ah club thar ri ruang a lang ṭan. English club hian nimin zing khan Al Ain 6-0 in an sawp a, match khat khelh hmabak la awmin Juventus nen group G aṭangin knockout stage an lut.

Italian club Juve hian Wydad AC 4-1 in an hneh thung a, match tawp berah Man City nen group hmahruaitu an zawng dawn. Europe team ṭha pahnih hian point ruk an hmu ve ve tawh a, June 26, Ningani zan dar 12:30 hian Camping World Stadium, Florida-ah an inkhel ang.

Goal thum phawt

Minute riatna lekah Ilkay Gundogan-a'n mi bikte goal khung danin a khung a, box chhungah rilru fim taka ball la thlain mual vei lam aṭangin goalkeeper Khalid Eisa chu cool zetin a pet khum. City midfielder Gundogan goal khung a mawi.

Claudio Echeverri, a hming i la hre lo a nih chuan i hre chho turah ngai ang. Kumin January thla khan River Plate aṭangin Man City hi a zawm a, season chawhnu lam erawh Argentine club tan loan hmangin a khel chhunzawm. Club World Cup-ah Man City tan a vawi khat nan a inlan a, minute 27-naah freekick mawi zetin a khung.

First half injury time-ah Manuel Akanji chu box chhungah pawh thluk a ni a, VAR hmanga ennawn hnuah referee-in penalty a pe. Erling Haaland rawn pen chhuakin keeper bumin goal thumna a khung.

Goal thum dang

Second half-ah pawh City bawk an chungnung a, Bernardo Silva-a'n ṭha taka a lakluh hnuah a ball fing tak chu Gundagon-a'n hmun chep takah a thiam thil hmangin hun thawl a nei thei a, minute 73-naah City goal lina a khung.

City rawlthar duhawm Oscar Bobb pawh a dam ṭha leh tawh. Kum 21 mi Norwegian winger Bobb hi season liam ta khan hliam vangin a khel mumal lo a, minute 84-naah Al Ain defender-te bum kualin ṭha zetin a pet lut.

Bobb ang thoa bench aṭanga rawn lut Rayan Cherki pawhin theihna sang a nei tih a pholang a, French midfielder erawh manto taka lakluh a nih avangin a beisei a sang sa hrim hrim. Minute 89-naah Cherki hian mawi zeta a dummy hnuah Haaland aṭangin ball ṭha a hmu lehnghal a, City goal rukna a khung.

City-in inkhel an thunun a, Phil Foden-a'n chance ṭha dang a hlah zawk. English club hian 6-0 in hnehna an chang a, Juventus lakah fiahna an hmachhawn ang.

Juve chu

Juventus pawhin Man City-in 6-0 zeta an sawp Al Ain hi 5-0 in an hneh thei a, City-in 2-0 a an hneh Wydad AC chu Italian club hian 4-1 in an hneh. Igor Tudor hote hi City aiin an goal difference a ṭha a, hei vang hian match tawp bera English club an chelh theih chuan an group-ah pakhatna an ni dawn.

Juve-in Wydad an hneh ṭum hian Kenan Yildiz-a'n goal hnih a khung a, ani hi Germany-a piang ni mah se a pa Turkish a nih avangin Turkey tan a khel thung. Season hman zawh takah khan Yildiz hian Juve tan goal 12 a khung a, City nen an inkhelh hunah pawh an en bik a hlawh ang.