Stadium hungna chhiat vangin mi 3 an thi

Algeria-a football inelna sang ber Ligue 1 chu Inrinni khan khelh zawh a ni a, MC Alger chuan an mual 5 July 1962 Stadium-ah NC Magra nen 0-0 in an inhnehtawk a, point khat hlu tak hlawh chhuakin champion an nemnghet. Referee-in hun tawp ham rik a ham hnu lawkah stadium chhawng chung lama champion lawm chuan a hungna an nek chhia a, mi 70 chuang an tla thla.

Stadium-a chhiatna thlengah hian mi pathum an thi a, mi 70 chuangin hliam an tuar. Hliam tuarte hi damdawi-in pathumah hruai an ni a, a tam zawk hi chhuah an ni leh tawh. Champion team MC Alger player leh coaching staff te damdawi-inah kalin thisen an pe.

Chhiatna thleng avang hian nomawi inhlan hun pawh hmang loin an sawn a, Algeria president Abdelmadjid Tebboune chuan hliam tuarte chu a tawrhpui thu sawiin, dam thuai turin duhsakna a hlan bawk.