Marquez a tlan fal zel

Pathianni zana tlan zawh tak Italian Grand Prix-ah Marc Marquez a chak ber a, Spanish rider hian championship table hmahruaitu a nihna a sawhnghet chhunzawm zel - amah hnaih bertu Alex Marquez aiin point 40 zetin a sang fal tawh a ni.

Mugello Circuit-a intlansiakah, Inrinni khan Sprint Race tlan niin Marquez hi a chak ber; intlansiak pangngai atan a hmasa berah a ding thei, a vawi 100 nan pole position a chang tihna a ni a, a dinhmun a ṭha nghal.

Corner hmasa ber aṭangin Marquez leh a nau Alex Marquez te bakah tualchhung tlangval Francesco Bagnaia te an inum na hle; Marc hi hnufual ve zeuh mah se lap kuanaah Alex tlan pelin hma a hruai leh, a tawp thlengin a chungnung.

Inelna an neih ṭan hmain Bagnaia chuan atan insiamṭhat theihna remchan a nih a beisei thu a sawi a, mahse Spanish rider pahnih a tluk loh bakah a hmaah amah ang bawka Italian rider Fabio Di Giannantonio a thleng a, palinaah a lungawi a ngai.

Hnehna changtu Marc Marquez chuan, "Ducati tan chuan Mugello Circuit hi tlankawng nuam leh ṭha a ni ṭhin a, a tira kan lo beisei lawk ang ngeiin thil pawh a thleng. Ka hnunga tlan pahnih kha min nawr na hle a, mahse chiai loin a tawp thleng," tiin a sawi.

Khawvela bike intlansiakna sang ber hi June 29, Pathianni tlaiah an tlan chhunzawm leh dawn. TT Circuit Assen-ah Netherlands Grand Prix an tlan leh dawn a ni.