Real Madrid an chak - last 16 a hnai
Club World Cup-a an match hmasa bera an chak zawh loh hnuin, Real Madrid-in hnehna an chang ve leh ta a, Mexican club ṭha Pachuca chu 3-1 in an hneh.
Spanish club hian minute sarihna lekah Raúl Asencio chu red card avangin an chân a, minute 83 chhung chu player 10-a an khelh avangin Xabi Alonso naute hian chak turin vanneihna an mamawh.
Real tan Jude Bellingham, Arda Guler leh Federico Valverde ten goal khat ṭheuh an khung a, Pachuca tan Elias Montiel chuan goal khat a khung ve bawk - awmzia a nei phak lo.
Madrid khaw club hian June 27, Zirtawpni zingah RB Salzburg an hmachhawn zui dawn a, hnehna an chan chuan last 16 an lut ang.
Player 10
Real-in an match hmasa berah Al Hilal chu 1-1 in an inhnehtawkpui a, coach thar Xabi Alonso hnuaia an match hmasa ber a nih bakah, boruak nei hata an lakluh Trent Alexander-Arnold leh pound maktaduai 50 man Dean Huijsen te tan Real kawr nena an match hmasa ber a ni bawk.
Spanish club ṭantuten Real 'thar' hmuh an inbeisei a, mahse, Saudi club lakah an chak zo lo. Pachuca lakah insiamṭhat an tum a, mahse, Mexican club lakah pawh goal aiin red card an hmu hmasa zawk!
Mexican club tan Salomon Rondon chuan goal khung theihna remchang a nei a, tlarhmaah amah chiahin ball a um lut. Mahse, hei hi Raul Asencio chuan lo titluin red card a chawi a, hnawhchhuah a ni.
Real vanneihna erawh Asencio foul-na hi box pawn a ni a, minute 83 khelh tur a la awm avangin an dinhmun erawh a derthawng tih loh rual a ni lo.
Beiseina siamtu
Mahse, Real fan-te hlauthawng taka an awm laiin Jude Bellingham a inlar a, English midfielder hian Fran García siamsak chu goal-ah a chantir a, player tlem zawk ni mah se, Real-in 1-0 in hma an hruai.
Real vanneihna a kaltluang laklawh. Chawlhlawk hman nan minute hnih chauh a awm tawh tihah Arda Guler a inlar a, Turkish midfielder hian Gonzalo Garcia siamsak chu an goal hnihna ni turin a khung.
Player tlem zawk ni mah se, Real-in boruak an ngam zawk a tih theih a, Pachuca-in chance nei ngah zawk mah se, a pawimawh ber goal an khung theih loh avangin Real an chungnung zawk.
Minute 70-naah Real tan Federico Valverde chuan a khung belh a, minute 10 hnuah Elias Montiel chuan Pachuca tan khung ve mah se, awmzia erawh a nei phak tawh lo.
Real vanneihna
Pachuca lakah Madrid khaw club vanneih thu sawi a ngai a, Real-in inenfiah an mamawh tihna a ni tel. Mexican club hian vawi 25 ngawt shot an nei thei a, heng zinga 11 ngawt chu target-ah a kal - an vanneih zan an tawng lo mai mai a ni.
Real tan keeper Thibaut Courtois chu 'a changtupa' a ni a, West Brom striker hlui Rondon leh Alan Bautista te chance neih a zawna a dan te, 3-1 a nih laia Carlos Sanchez-a chance neih a dansakte pawh a ṭha thlawt.
Pachuca tan Rondon-a'n chance a nei nual a, Kenedy pawhin a hun ṭha neih a chhawr lo - Kenedy hi Chelsea tan pawha lo khel tawh player kha a ni a, Rondon nen hian Newcastle United-ah an khel dun tawh bawk.
Alexander-Arnold-a'n beisei a phak lo chhunzawm zel a, Real-in Club World Cup-a an chhawr theih loh hlau a, a lei ngeia an leichhuah right back hian danglamna a la thlen rih lo.