Chi inthliarna hmangin Rudiger an bei - Alonso

Real Madrid-in 3-1 in Pachuca an hneh a, inkhelh zawhah Real coach Xabi Alonso chuan a defender Antonio Rudiger chu chi inthliarna hmanga beih a nih thu a sawi a, Real an lawm lo.

Bank of America Stadium-ah fans 70,248 zetin inkhel an en a, hun pek belhah Rudiger hi Pachuca captain Gustavo Cabral nen an intibuai a, Rudiger hi referee Ramon Abatti Abel hnenah a zualko zui.

Referee hian a ban pahnih hmangin, 'X' a siam. Hemi awmzia chu, thil thleng hi chhui tur, tihna a ni. Mahse, Cabral chuan chi inthliarna lam hawia a ṭawng loh thu a sawi a, "Ṭawngkam mawi lo tak chu ka hmang ngei a, mahse, chi inthliarna lam a ni lo," a ti.

Alonso chuan, "Rudiger-a'n chi inthliarna lam hawia beih a nih thu min hrilh. Enge thleng zel dawn chu kan nghah a ngai a, FIFA-in a chhui turin referee khan thutlukna a siamin ka hria.

"Hetiang ang thil hi thil duhawm lo tak a nih avangin Antonio kan thlawp a, eng level-ah pawh ni se, a thleng tur a ni lo a, a thleng a nih chuan hma lak nghal vat zel hi a pawimawh," a ti.

Real boss thar chuan a player chu a rin tawk thu sawiin, "Antonio-a'n thil thlen dan min hrilh a, kan ring tawk a ni," a ti a, Cabral chu hrem a nih ngei a beisei.

Mahse, Pachuca captain chuan, "Kan intibuai ve a ni mai. Kan intauh fuh a, mahse, ani chuan ka hnekah a ngai tlat. Chuvang chuan kan inhnial a, referee khan chi inthliarna thleng angin chhinchhiahna a siam zui. Mahse, chutiang engmah ka tih loh thu ani pawh kha ka hrilh," a ti.

Pachuca head coach Jaime Lozano chuan, "Cabral nen kan la sawi dun lo. Tunah in sawi a, ka hriat ve chiah avangin engmah sawi theih ka nei rih lo. A thleng ngei a nih chuan sawi mawi theih a ni lo.

"Cabral nen hian kan la inhrechiang lutuk lo a, mahse, Pachuca player-ten chi inthliarna lam hawia hmingchhiatna an neih ka hre ngai lo. Ka captain hi a tihdik lohah chuan chhan ka tum lo a, mahse, ka titipui phawt ang," a ti - Mexico coach hlui Lozano hian May 2025 khan Pachuca hi a enkawl ṭan ve chauh.

Kum 2021 khan Rudiger hian Chelsea tana a khelh laiin, football-ah chi inthliarna doa theihtawp chhuah a ni chungin, engmah a la danglam loh thu a lo sawi tawh a, "A do turin theihtawp ka chhuah zel ang," a ti bawk.

FIFA hian Club World Cup-ah hian, 'anti-racism campaign' na thil vel a titawp nia sawi niin, campaigner ṭhenkhat chuan an lo sawisel tawh.