Forest-a kum thum dang cham tur Nuno

Nottingham Forest boss Nuno Espirito Santo chuan City Ground-a kum thum dang cham turin contract thar a ziak a, Portuguese coach chuan, "He club ropui taka ka zinkawng ka chhunzawm zel thei tur hian min tilawm hle a ni," a ti.

Nuno hian December 2023 khan Forest hi a enkawl ṭan a, hetihlai hian Premier League aṭanga tla thei dinhmunah an ding. Mahse, Tottenham Hotspur boss hlui hian, sum hman phal chin aia tam hman vanga hrem nana point li paihsak an ni chungin, 17-naah season a kharpui a, EPL an khelh chhunzawm.

Season hman zawh takah pawh 'relegation battle' hmachhawn tura ngaih an nih laiin European football khel turin an inpetkai - Champions League an beisei hman zawk hial a, mahse, an match hnuhnung pasarihah vawi hnih chiah chakin pasarihna an ni.

Season tharah Europa Conference League an khel dawn a, 1995-1996 season hnua European football an khelh leh hmasak ber tur niin, FA Cup semifinal hial an thleng bawk.

Mahse, Manchester City lakah 2-0 in an tlawm a, kum 1991 hnua FA Cup semifinal an khelh leh hmasak ber a ni.

Nuno chuan, "Forest kan zawm tirh aṭangin, players, fans leh he club-a tel zawng zawngten inkungkaihna ṭha zawk kan neih theih nan kan thawkrim hle - chu chuan season hmasaa kan hnathawh ropui tak pawh kha min thlenpui a ni," a ti.

Forest neitu Evangelos Marinakis chuan, "Nuno hian kan hnen a awm hnuah hna ropui tak a thawk a, player-te an theihna sang bera khel chhuak turin a pui a, player a chher hriam a, first team-ah player naupang zawk ho a kaihruai bawk.

"Nuno nen hian kan inpawh em em a, a pawimawh berah erawh Nottingham Forest tana kan duhthusamte a inang a, he club tana Premier League leh Europe inelna hmachhawn a, nomawi chawisak hi kan châk em em a ni," a ti a, hmachhawp an nei ropui hle.