Leverkusen-ah Quansah lut dawn

Tun nipui transfer zet chu Liverpool leh Bayer Leverkusen an in 'man' riau - Reds-in German club player langsar pahnih, right back Jeremie Frimpong leh attacking midfielder Florian Wirtz an lakluh hnuah Leverkusen chuan Reds centre back Jarell Quansah an la lut ve dawn thung.

Kum 22 mi Quansah manah hian Leverkusen hian pound maktaduai 30 vel an inseng dawn nia sawi a ni a, a khelh ṭhat dan a zira pek belh tur a awm dawn bawk - Reds hian an duh chuan an lei let theih dan tur ziah tel an tum bawk niin an sawi.

Liverpool academy chhuak Quansah hian August 2023 khan Reds tan a match hmasa ber a khel a, fan-ten a chungah beiseina an nei sang hman hle. Mahse, Arne Slot a hnuaiah beisei angin hmun a chang lo a, inkhel pawimawhah tihsual a ching bawk.

Quansah hian Bristol Rovers-ah loan-in a khel zuai tawh tih loh chu club dang tan a la khel ngai lo. Liverpool tan match 58 khelin goal thum a khungsak tawh a, assist vawi thum a nei bawk.

Liverpool hian Quansah an hralh hmain, nipui bazarah centre back an zawng sa nia sawi a ni a, Crystal Palace defender Marc Guéhi hming a ri ring hle. Hetihlai hian player neih sa Ibrahima Konate erawh contract thar chungchangah an la inrempui thei lo.