PSG an tho lehnghal

Botafogo lakah tawlhthlu zeuh mah se, Paris St-Germain an insiamṭha lehnghal a, French club hian Thawhṭanni zan khan Seattle Sounders chu 2-0 in an hneh a, Club World Cup-ah last 16 an lut.

PSG tan Khvicha Kvaratskhelia leh Achraf Hakimi ten goal khat ve ve an khung a, MLS club-in a chhanletna tur an nei lo - Kvaratskhelia goal khung hi Vitinha thawhchhuah a ni.

Football khawvela langsar thar Vitinha hian yard 20 vela hla aṭangin a 'shot' a, heta ṭanga ball kal zel chuan Kvaratskhelia hi perin, goal-ah a lut.

Goal hnihna hi counter aṭanga an khung niin, Bradley Barcola-a ball pek chu Hakimi chuan goal-ah a chantir a, 2-0 in French club hi an chak.

Seattle-a inkhelah PSG-in chak an phu, tiin a sawi theih a, Desire Doue chuan goal khung theihna chance vawi thum ngawt neiin, Sounders keeper Stefan Frei chuan a dansak vek!

MLS club hian si phurh sut theihna remchang nei ve mah se, an chhawr lo a, PSG keeper Gianluigi Donnarumma-a'n Sounders forward Jesus Ferreira chu chesualin ball pe mah se, US international hian goal-ah a chantir thei lo.

PSG hian an match hmasa berah Atletico Madrid chu 4-0 in an sawp a, rin loh takin Botafogo lakah 1-0 in an tlawm zui. Mahse, a tawpah insiamṭhain, Seattle Sounders an hneh a, last 16 an lut ta.