Atletico Madrid an vanduai

FIFA Club World Cup-ah Atletico Madrid-in Paris St-Germain, Botafogo leh Seattle Sounders FC te group B-ah an awmpui a, Seattle tih loh zawngin point ruk ṭheuh nei mah se, PSG leh Botafogo an tlang laiin Atletico erawh an tla!

Atletico Madrid hian PSG an ngam loh hnuah, 3-1 in Sounders an hneh a, Thawhṭanni zan inkhelah Botafogo chu 1-0 in an hneh bawk - hun tawp nan minute thum chauh a awm tawh tihah Antoine Griezmann chuan inkhela goal awmchhun a khung.

Madrid khaw club hian tlang turin si thum fai tala chak an mamawh tih an inhria a, mahse, an beisei goal an hmu lawk thei lo - Julian Alvarez a hmuhnawm a, a pawimawh ber goal erawh a thawk chhuak thei lo.

Bench aṭanga luhtir Griezmann-a'n khelmual a luh hnuah Atletico goal nawr a na sawt a, French forward hian uiawm takin post a pet per nghal.

Alexander Sorloth pawhin khung theihna remchang a nei a, uiawm takin hnai set sawtah a tauh goal lo - goal hmaah Atletico an vanduai a, a tawpah chuan an tlakpui ta hial!

First half hun pek belhah Alvarez-a'n penalty a beisei a, video assistant referee (VAR) inrawlhin, referee Cesar Ramos chuan khelmual sirah thil thlen dan a ennawn.

Alvarez lakah foul a awm ngei a, mahse, foul a awm hmain Sorloth zawk a lo foul hmasa a, Botafogo zawkin freekick an hlawh chhuak ta daih - Diego Simeone leh a nauten puanthuah an tel a, USA an hawsan.