Goal riat luhna Porto vs Al Ahly

Nimin zinga FIFA Club World Cup inkhel pakhatah goal riat ngawt a lut a, Porto leh Al Ahly chu 4-4 in an inhnehtawk - club pahnih hian chak nei loin CWC an mangṭha a, beisei tur nei loin puanthuah an tel zui.

MetLife Stadium-a inkhelah Al Ahly tan Wessam Abou Ali chuan hattrick a siam a, a goal hmasa ber hi minute 15-na lekah a khung. Porto lakah 1-0 in hma an hruai a, mahse, Portuguese club hian minute riat hnuah Rodrigo Mora hmangin an chhanglet.

First half hun pek belhah Palestine international Wessam Abou Ali a inlar leh a, penalty hmanga goal khung nawnin, 2-1 a ni. Mahse, Porto-in tlawm vek chunga haw duh loin, second half ṭantirah William Gomes hmangin si phurh an sut.

Abou Ali bawkin Al Ahly tan a khung leh a, 3-2 a ni. Mahse maw, a la tawp lo - Porto tan Samu Aghehowa chuan si phurh sut lehin, 3-3 a ni a, heti hian inkhel hi a tawp mai tawh dawn niin a lang hman.

Mahse, Al Ahly-in ngaihdan dang an nei a, Mohamed Ali Ben Romdhane chuan chakna goal ni ngei tura ngaih theih tawh chu minute 64-naah a khung - mahse, Brazilian forward Pepe hun a her chhuak a, minute 89-naah si phurh sutna goal a khung hram!

A tawpah chuan team pahnihin point an insem a, point hnih ve ve hmuin US an mangṭha - an group awmna aṭangin Palmeiras leh Inter Miami ten last 16 an lut.