Club World Cup-a hming chher Jobe

FIFA Club World Cup-ah Real Madrid tan Jude Bellingham-a'n goal a khung a, Borussia Dortmund tan a nau Jobe Bellingham-a'n a khung ve bawk. CWC-a unaua goal khung thei hmasa ber an ni a, Jobe-a'n German club tan a u hnung a zui zo rih hle.

Zanin dar 12:30 hian Dortmund hian Ulsa nan hmachhawn dawn a, group F inkhel dangah Fluminese leh Mamelodi Sundowns te an inkhel bawk ang. German club hian goal difference-ah Fluminese hi tluk lo mah se team nem bera ngaih South Korean club Ulsan an hmachhawn dawn avangin last 16 lut turin an dinhmun a ṭha bera ngaih a ni.

Jobe hian June 10, Thawhlehni khan Dortmund hi £27.8 mtd-in a zawm a, Jude a nau a nih vang chauh ni loin a man vang hrim hrim pawh hriat a hlawh. Sunderland-in an player an hralh to ber a ni a, Dortmund player lakluh man to ber dawttu niin Ousmane Dembéle chauh a tluk lo.

Kum 19 mi Jobe hian Sunderland chu Premier League-ah a kaipui a, English league sang ber pawha la khel lo hi Dortmund-in man to takin an lei ngam a, a chhan chu a theihna a sang vang a ni.

Real Madrid midfielder Jude pawhin, "Ka nau inkhel hi kan en ho a, goal hnih a khung. Ancelotti chuan, 'Ani lo zawk kan la lut. Real-ah ka la lut dawn,' a ti a.

"Kei chuan, 'I khelhtir dawn a mi?' ka tih chuan, Carlo chuan, 'Aw, i position-ah a khel ang,' tiin min chhang," tiin a nau chanchin hi nikum lam khan a lo sawi tawh.

Jobe hian hma a sawn zel a nih chuan Real Madrid pawhin an la lut lo ang, tih a sawi theih loh. Chutihrualin Club World Cup-ah pawh first round an la khel zo lo a, Jobe hi man of the match-ah thlan ni tawh mah se football zin kawng tir lam a la zawn ṭan chauh a ni.