Sinner leh Alcaraz an inhnaih takzet ta!

Association of Tennis Professionals (ATP) chuan Thawhṭanni zan khan world rankinga ti chhuak thar a, a chung berah Jannik Sinner awm chhunzawmin pahnihna Carlos Alcaraz nen an inthlauhna chu point 1130 chauh a ni.

June 30 aṭangin Wimbledon khelh a ni dawn, tuna world ranking thar ber hi grass court inelna lian a draw an neih hun atan hman a ni tawh dawn - Zirtawpni hian inkhelh dan tur hi pawh a ni ang.

Roger Federer leh Rafael Nadal te hun a liam a, tunah Novak Djokovic chu a hun tawp lam a ni mek bawk; hetiang boruak karah hian Sinner leh Alcaraz te an rawn dawk chhuak, midang chunga leng an ni mek.

Sinner leh Alcaraz te hian season hmasa khan Grand Slam pali chu pahnih ve vein an insem, kuminah pawh major tournament pahnih an khelh tawh chinah anni pahnih bawk hi an champion - Wimbledon atan pawh rinkai an ni leh ang.

French Open khelh zawh takah khan Sinner leh Alcaraz te hian final hmuhnawm bik an khel a, a tawpah Alcaraz a dingchang; mi tam tak chuan Federer leh Nadal te inelna boruak ang kha an neih chhoh theih an ring hial.

Spanish tlangval Alcaraz hian Wimbledon inbuatsaihna a nei ṭha chhunzawm; Queen’s Club Championships title lain grass court chu atan hmun ṭha a nihzia a lantir a, nikuma nomawi a chawi tawh Wimbledon a la nawn a nih pawhin a mak lo ang.

Sinner erawh Halle Open lamah inlan mah se a hlawhtling lo thung. Italian tlangval hian thla thum chhung hremna a hman zawh hnuah tournament a khel ṭha thei leh tawh hle, a theihna sanzia erawh hmuh hmaih a la ni lo thung.