Haliburton-a hliam a na

Indiana Pacers superstar Tyrese Haliburton chu a ke artui chunglam tha zai a ni a, hun rei tak chhung basketball a khel thei dawn lo - US chanchinbu ṭhenkhat chuan 2025-26 NBA season lo awm turah a inlan thei lo hial mai thei niin an sawi.

Kum 25 mi Haliburton hi Pacers tana mi pawimawh a ni, court chhunga a awm leh awm loh a hriat theih hle. NBA Finals Game 7 an khelh ṭum pawhin an innghahna a ni a, mahse inkhel ṭan aṭanga minute sarihnaah basket neih tumna a tlan chu tluin a inkhel zui thei lo.

Haliburton hi khel tlang thei ni se la chuan Pacers kan champion an beisei ngam hial ang, mahse an thiampuipa awm loh hnuah Oklahoma City Thunder chuan lehthalin an champion ta zawk.

NBA All Star zinga vawi thum tel tawh Haliburton hma hian - tun season playoff khelh zawh takah khan Boston Celtics star Jayson Tatum leh Milwaukee Bucks thiampuipa Damian Lillard te chu ke artui hliam vangin an lo buai ve tawh bawk a ni.

Golden State Warriors tana a khelh laiin, kum 2019 NBA Finals-ah Kevin Durant pawh a lo hliam tawh a, hemi hnu hian season khat chhung a inkhel thei lo; player hliam tawhte chawlh chen chhut chuan Haliburton hi a chawlh rei a rinawm.

Haliburton chuan, "Tun ṭuma kan chak lohna kha na ka ti em em a, ka ṭhiante pui thei loa ka awm kha hrehawm ka ti zual. Engtik niah emaw chuan ka ṭhiante bakah min ṭantute tan hian ṭha takin ka la khel ve leh thei ngei ang.

"NBA Finals kan thlen theih hun nghakin ka bei hram hram ṭhin a, ka beisei a thlen dik hnua ka tawp dan erawh hrehawm ka ti hle. Engtik niah emaw chuan ka la tho chhuak ve leh ang," tiin a sawi.

An chak loh hnuah Pacers coach Rick Carlisle chuan, "Haliburton a tluk chiah khan amah chauh a tlu a ni lo a, player dangte rilru pawh a nghawng tel vek," tiin a lo sawi tawh a, a player duhlai chu dam leh thuai tura a duhsak thu a sawi bawk.

Haliburton a chawlh chen tur hi chiang taka puan a la ni lo a, mahse a rei lo berah pawh thla riat aṭanga thla 10 chhung tal chu a chawlh a ngai dawn a ni.