Juve khan min hnuchhawn –Pogba

Paul Pogba chuan hun harsa a tawh laiin Juventus chuan an hnuchhawn niin a sawi. Damdawi hman phal loh a hman avangin thla 18 chhung hrem a ni a, hlawh petu Old Lady tan chuan duat taka enkawl chi erawh a ni bik lem lo mai thei.

A tirah chuan Pogba hi kum li chhung atan hrem a ni. Mahse, infiamna lama thubuai ngaihtuahtu sang Court of Arbitration for Sport (CAS) hnenah a zualko a, hremna hi thla 18 chhung tan an pawh tawisak.

Kum 32 mi Pogba chuan, "Juventus kha min pui turin ka ngen a, mahse min pui lo. Fitness coach ka dil a, mahse ka chungah zahngaihna an lantir lo. Team chhunga mi ka la ni a, thlawpna engmah ka dawng lo kha mak ka tiin min barakhaih hle.

"Ka fate school kal hruaiin ka chhuak ṭhin a, engtik hunah nge ka inkhelh ve leh theih ang tiin min zawt ṭhin a, chhan harsa pawh ka ti thei hle," tiin a hun harsa chungchang a sawi.

Pogba hian AS Monaco a zawm dawn niin an sawi a, puan chian la awm chiah lo mah se Ligue 1 club tan season hnih daih contarct a ziak ngei dawn niin a lang.

Pogba chuan, "Tunah chuan ka rilru leh taksa hi inkhel turin a inpeih leh tawh a, kum 32 mi chauh ka la nih avangin ṭha takin ka la inkhel leh thei ang tih hi ka ring tlat a ni," tiin a sawi.