Dries Mertens-a'n inkhelh a chawlhsan

Napoli tana goal khung tam ber Dries Mertens chuan football a chawlhsan thu a puang ve ta. Belgium forward hi Galatasaray tana khel lai a ni a, a contract neih lai hu June-ah hian a zo dawn, pawtsei loin a chawl zui dawn ta a ni.

Kum 38 mi Mertens chuan social media kaltlangin inkhelh a chawlhsan thu hi a puang a, mahse Napoli tana a lo khelh pui tawh ṭhin Marek Hamsik-a tan July hian exhibition match a khel dawn tih erawh a puang tel nghal bawk.

Mertens hian kum 2007 khan Gent aṭangin a football zinkawng a zawh ṭan a, chumi hnuah Eendracht Aalst, AGOVV, Utrecht leh PSV Eindhoven tan te pawh a lo khel tawh a ni.

Kum 2013 khan Serie A club Napoli a zawm a, Italian club tan hian inelna hrang hrangah match 397 khelin goal 148 a khungsak a, an club tana goal khung tam ber a ni hial.

Naples club tan hian Italian Cup vawi hnih a lak pui hnuah kum 2022 khan Galatasaray a zawm. Turkey lamah pawh a hlawhtling chhunzawm, a zawnin kum thum chhung chu Turkish Super Lig title an la thei a ni.

Belgium tan pawh match 109 a khelh aṭangin goal 21 a khung a, 2022 World Cup kha ram tana a feh chhuah hnuhnung ber chu niin hemi tournament-ah hian group stage an paltlang zo lo a ni.