Chelsea hmathlir ka duh - Delap

Liam Delap chuan a club thar Chelsea hmalak dan leh an hmachhawp te chuan a ti phur hle tih a sawi a, club ṭhenkhatin sawm ve bawk mah se London club a zawm chhan niin a sawi.

Kum 22 mi Delap hian season hmasa Premier League-ah khan Ipswich Town tan match 37 khelin goal 12 a khung a, a contract-ah pound maktaduai 30 a lei chhuah theih a nih thu a inziak tel.

Manchester United, Everton, Newcastle leh Nottingham Forest ten an nghaihven karah Delap hian Blues a thlang. Delap chuan, "Thutlukna ka siam dik em tih chu hunin a la hril dawn a, tuna sawi vek theih a la ni lo.

"Sawi lawk theih ni lo mah se Chelsea hmathlir te ka zirchiang a, ka tana ṭha tur nia ka ngaihah ka kal. Khawi lamah nge ka kal ang tih ka ngaihtuah ngun hle, a tawpah chuan a ṭha ber tura ka ngaih ka zawm," tiin a sawi.

Chelsea hian Cole Palmer an nei a, English forwad hi tun hnai season hnih chhung chu tlarhma lama an chhuanvawr a ni. Delap chuan, "Cole Palmer nen ka chanchin sawizawm an awm, ka tan chuan a lawmawm zawk hle.

"Tlarhma lama khel chi ve ve kan ni a, ṭha takin kan khel dun thei ngei ang tih pawh ka ring," tiin a sawi.