Ramhlun North chhantu Chhinga Veng tahna Penalty

MS Dawngliana goal hmangin Chhinga Veng mipui an lawm hmasa a, hun tawp hma hreta sawi zui hlawh penalty hmangin Ramhlun North-in an siphurh an sut.

Mizoram Premier League Season 5 inkhel a hmuhnawm chho a, entu mipuiin boruak an tihsan belh bawk avangin Ningani zana MPL kaithar pahnih te 1-1 a an inhnehtawk pawh hian sawi zui a hlawh hle.

Ramhlun North-in Zosang-liana (Chhaia) penalty hmanga point khat an hlawhchhuah avangin table-ah panganaah an inhlangchho a, Chhinga Veng erawh pasarihnaah awmin an hnuaiah Zo United chiah an awm.

Hei le, Dawngtea chu

MPL ṭan hmaa Chhinga Veng an sawi vul chhan pakhat chu MPL top scorer leh best forward ni tawh MS Dawngliana an lakluh vang a ni a, tun season-ah erawh inhliam vangin Bawngkawn tlangval hi a inlan meuh lo.

Ramhlun North nen pawh hian 100% fitness nei lo Dawngtea langsar lo mah se minute 34-naah goal ropui bik a khung. Chhinga Veng midfielder Vanlalthanga cross chu Ramhlun North defender-in hmun himah pet chhuak thei loin Dawngtea'n a ke vei lamin goal kilah kawh zetin a pet lut a, K. Kawla Stand-a ṭhu Chhinga Veng mipui thawm a ṭha hle.

Chhinga Veng-in goal khat an neih hnuah penalty shout an nei a, Ramhlun North winger David Lalrinchhana'n box chhungah Laldinliana titlu mah se referee-in penalty pekna tur khawpah a ngai lo.

MPL3 best defender Emma Chigozie a khelh ṭhat avangin Ramhlun North forward Onyeama Francis Okechukinu dah ṭhatin a awm a, minute 25-na leka inhliam vanga Isaac Lalruatpuia lakchhuah a nih bawk avangin Lalruatliana Sailo hote inkhelin ṭum dang a pha lo. First half tawp hma hretin Chhaia ball pet chu Chhinga Veng keeper R. Lalhmangaihzuala'n harsatna nei loin a dan sak a, hei chiah hi goal hlauhawm an nei.

A ngaihnawm zel

Ramhlun North-in insiam-ṭhat tumin midfielder Lalchhuanpuia an luhtir a, Isaac-a thlaktu substitute Vanlalthlamuana hmangin chance ṭha ber an nei a, Chanmari forward hlui hian goal zawnah a pet thei lo.

Inkhelah erawh Chhinga Veng an chungnung chhunzawm a, Zo United laka goal hnih khungtu Vanlallawma'n captain Joseph Lalnunpuia cross a tauh lut teuh hle. Boruak a san avangin referee hmuh loh lai remchang la player an awm zeuh zeuh a, buaina tenau awm bawk mah se minute 90 chhung red card phawrh a nih loh bakah yellow card pali bak phawrh a ni lo.

Penalty chu...

Hun tawpah Chhinga Veng an chesual leh a, player pakhatin an defender khumin an lamah a tauh let avangin Ramhlun North forward Francis-a'n goal khung ngeina tur hun ṭha a neih phah a, back pass a nih vangin a offside thei lo bawk.

Minute 90 chhung khel ṭha Emma-a'n a tlan chakna hmanga va nangching hmanin, hnung lam aṭangin Nigerian forward Francis ball chan hi a pet sawn sak a, referee-in hun rei lote chhungin thutlukna a siam a ṭul. Eng thutlukna pawh siam se, inkhel entu zingah lawm lo zawk an awm a ngai a, referee thutlukna vanga lawm lo chu Chhinga Veng an ni.

Francis-a penalty hlawh pet tur hian Zosangliana rawn pen chhuakin kumin I Day Football best player hian goal-ah a chantir a, goal dang a luh belh tawh lo - MPL kaithar pahnih an inhnehtawk.

Eng nge an sawi?

Ramhlun North coach Lalruatliana Sailo chuan, "A vannei zawkah kan ṭang a ni. Penalty kha ka hmuh danah chuan a âwm a, replay te kan en leh ang a, chiang zawkin kan hre thei ang. Referee khan keini aiin a hmu hnai zawk a, a tih tur a tiah chuan ka ngai," tiin inkhelh banah a sawi.

Tawia chuan chhunzawmin, "Foreigner kan lak hian beisei kan nei sang a, amaherawhchu kan khingpuite an foul nasat lutuk chuan an theihna a lang chhuak thei lo. Referee khan Francis kha a chhan lo deuh chuan ka hria," tiin a sawi.

Chhinga Veng assistant coach Lalrammawia chuan, "Kan naute khelh danah kan lungawi a, kan khel ṭha ka ti. Penalty chungchangah chuan kan lungawi zan lo a, penalty turah ka ngai lo. Champhaiah penalty vangin Ramhlun North hi kan hneh lo tawh a, zaninah hand ball vang thoa kan penalty beisei pek kan ni lo bawk. Tun dinhmunah chuan referee te hian duhthu an sam lo a ni," tiin a lungawi loh thu a sawi.

ZoFooty Statistics

Chhinga Veng 1 - 1 Ramhlun North

CVFC: MS Dawngliana 34'

RNFC : Zosangliana Sailo 88'

MoM: Emma Chigozie, CVFC

55% Ball Possession 45%

13 Shots 7

3 On Target 2

2 Yellow Cards 2

0 Red Cards 0

Powered By Rainbow Multibrand

Mobile Showroom

Tute nge inlan?

Chhinga Veng (4-4-2) : R. Lalhmangaihzuala; R. Laldinliana, K. Lalhlahlova, Emma Chigozie, Lalramfelpuia; Vanlallawma, Joy Mrona Khar Raswai, Vanlalthanga, Vanlallawma; Joseph Lalnunpuia, MS Dawngliana (PC Vanlalhmangaihzuala 84').

Ramhlun North (4-2-3-1) : Liansangpuia; Lalmuanawma, C. Ramdinmawia, Lalramthlamuana, Lalmalsawma; Zosangliana, Lalruatkima Dosel (Lalchhuanpuia 46'); Isaac Lalruatpuia (Vanlalthlamuana 25'), B. Malsawmzuala, David Lalrinchhana (Jerry F. Zonunsanga 84'); Onyeama Francis Okechukinu.